banner 11.2017

ໜອງຟ້າມະຫັດສະຈັນ

nongfa

ຄົ້ນຫາພາທ່ຽວ ອັດຕະປື

tour 2018

ສະຖິຕິ ຜູ້ເຂົ້າຊົມເວັບໄຊ

ມື້ນີ້:ມື້ນີ້:132
ມື້ວານນີ້:ມື້ວານນີ້:443
ອາທິດນີ້:ອາທິດນີ້:2372
ເດືອນນີ້:ເດືອນນີ້:132
ທັງໝົດ:ທັງໝົດ:607469

Lao National Radio

radio

ແຜນທີແຂວງ ອັດຕະປື

administrative map

 

 

ຫ້ອງວ່າການ 4 ແຂວງພາກໃຕ້ ແລກປ່ຽນບົດຮຽນວຽກງານຫ້ອງວ່າການ

ໃນຄັ້ງວັນທີ 23 ເມສາ 2022 ໄດ້ເປີດກອງປະຊຸມພົບປະແລກປ່ຽນບົດຮຽນ ຄັ້ງທີ 2 ວຽກງານຫ້ອງວ່າການ 4 ແຂວງພາກໃຕ້: ແຂວງ ອັດຕະປື; ແຂວງ ເຊກອງ; ແຂວງ ຈໍາປາສັກ; ແຂວງ ສາລະວັນ ທີ່ຫໍປະຊຸມໃຫຍ່ ຂອງແຂວງອັດຕະປື ໂດຍແມ່ນແຂວງອັດຕະປື ເປັນເຈົ້າພາບ; ກອງປະຊຸມພາຍໃຕ້ການ ເປັນປະທານຂອງທ່ານ ສຸລິຈັນ ພອນແກ້ວ ກໍາມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການແຂວງອັດຕະປື, ມີຄະນະປະທານຮ່ວມຂອງ ທ່ານ ປອ. ວັນນະໄຊ ຊາດຕະກຸນ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການແຂວງ ຈໍາປາສັກ, ມີທ່ານ ສີສຸພັນ ມະຫາວົງ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການ ແຂວງເຊກອງ; ມີທ່ານ ສົມໃຈ ບຸດສະຫານິມິດ ຄະນະພັກຮາກຖານ, ຮອງຫົວໜ້າຫ້ອງວ່າການ ແຂວງສາລະວັນ. ນອກນີ້ ຍັງມີບັນດາທ່ານ ຫົວໜ້າ-ຮອງຫົວໜ້າຫ້ອງວ່າການແຂວງ, ຫົວໜ້າ-ຮອງຫົວໜ້າຂະແໜງ ພ້ອມດ້ວຍບັນດາ ທ່ານພະນັກງານ-ລັດ ຖະກອນ ຫ້ອງວ່າການ 4 ແຂວງ ໃຫ້ກຽດເຂົ້້າຮ່ວມທັງໝົດ 225 ທ່ານ; ຍິງ 97 ທ່ານ.

ປະທານກອງປະຊຸມ ໄດ້ມີຄຳເຫັນກ່າວຄຳຢ້ຽມຢາມຖາມຂ່າວ, ຕ້ອນຮັບບັນດາທ່ານ ຄະນະນໍາ ແລະ ພະນັກ ງານ-ລັດຖະກອນ ຫ້ອງວ່າການ 4 ແຂວງ ດ້ວຍຄວາມອົບອຸ່ນ ແລະ ຮັກແພງ, ກ່າວເປີດກອງປະຊຸມ ແລະ ໄດ້ກ່າວເນື້ອໃນຈຸດປະສົງ ຂອງກອງປະຊຸມ ພົບປະແລກປ່ຽນບົດຮຽນ ວຽກງານຫ້ອງວ່າການ 4 ແຂວງ ເພື່ອໃຫ້ກອງປະຊຸມ ສົນທະນາແລກປ່ຽນຄວາມຄິດເຫັນ ໃນວຽກງານຫ້ອງວ່າການ ໄດ້ກາຍເປັນເສນາທິການ ທີ່ດີເທື່ອລະກ້າວ.

ການພົບປະແລກປ່ຽນບົດຮຽນ ວຽກງານຫ້ອງວ່າການ 4 ແຂວງພາກໃຕ້ຄັ້ງນີ້ ໄດ້ແບ່ງອອກເປັນ 2 ວາລະໃຫຍ່ ຄື: ວາລະທີ 1 ຈັດຂຶ້ນໃນຄາບເຊົ້າ ເພື່ອແລກປ່ຽນບົດຮຽນ ທາງດ້ານວຽກງານ ວິຊາສະເພາະຫ້ອງວ່າການ 4 ແຂວງ; ວາລະທີ 2 ຈັດຂຶ້ນໃນຄາບບ່າຍ ເພື່ອແລກປ່ຽນກິດຈະກໍາກິລາຟຸດຊໍ ແລະ ດຶງເຊືອກ.

ວາລະກອງປະຊຸມແລກປ່ຽນ, ໄດ້ມີການຜັດປ່ຽນກັນຂຶ້ນ ລາຍງານຫຍໍ້ ກ່ຽວກັບການຈັດຕັ້ງ ປະຕິບັດວຽກງານຫ້ອງວ່າການ ແຂວງແຕ່ລະແຂວງ, ຈາກນັ້ນກໍ່ໄດ້ມີການ ຕັ້ງຄຳຖາມແລກປ່ຽນບົດ ຮຽນຮ່ວມກັນເປັນແຕ່ລະຫົວຂໍ້ ເປັນ ຕົ້ນ:

+ ແຂວງຈໍາປາສັກຂໍແລກປ່ຽນ:

1). ການຊຸກຍູ້ຕິດຕາມບັນດາມະຕິ, ຄໍາສັ່ງ ຊ່ວຍການນໍາ ແລະ ການແກ້ໄຂບັນຫາສາຍດ່ວນ 1516 ບັນດາແຂວງ ເຮັດຄືແນວໃດ ໃຫ້ມີຄວາມວ່ອງໄວທັນເວລາ ?.

2). ການຄຸ້ມຄອງເອກະສານ, ການຈາລະຈອນເອກະສານ ຂອງບັນດາແຂວງ ເຮັດຄືແນວໃດ ?

3). ວຽກຄຸ້ມຄອງ-ກໍ່ສ້າງພະນັກງານ ບັນດາແຂວງ ມີບົດຮຽນຄືແນວໃດ ?

4). ການກະກຽມກອງປະຊຸມກໍ່ສ້າງຮາກຖານການເມືອງ ໄດ້ມີການປະສານງານ ແລະເຮັດຕົວຈິງຄືແນວໃດ ?

5). ວຽກອະນຸສາວະລີ ເປັນວຽກໃໝ່, ບັນດາແຂວງມີບົດຮຽນການປະຕິບັດຄືແນວໃດ ?

+ ແຂວງເຊກອງມີຄໍາເຫັນແລກປ່ຽນ ແລະ ສະຂໍ້ສະເໜີ

1). ການກະກຽມກອງປະຊຸມອົງການປົກຄອງແຂວງ ແລະ ກອງປະຊຸມຄະນະບໍລິຫານງານພັກແຂວງ ບັນດາແຂວງ ເຮັດຄືແນວໃດ ?.

2). ວຽກກໍ່ສ້າງຮາກຖານການເມືອງ ໂດຍສະເພາະແມ່ນດ້ານງົບປະມານໃນການກະທົບໃສ່ແຜນຍຸດທະສາດ, ບັນດາໂຄງການຕ່າງໆ ບັນດາແຂວງໄດ້ມີບົດຮຽນຄືແນວໃດ ?.

3). ກົນໄກການຊຸກຍູ້ວຽກ 2 ວາລະແຫ່ງຊາດ ບັນດາແຂວງ ໄດ້ມີກົນໄກຄືແນວໃດ ?

4). ການຈັດຕັ້ງປະຕິບັດ ດໍາລັດ 599/ລບ ວ່າດ້ວຍລົດ, ບັນດາແຂວງໄດ້ຈັດຕັ້ງປະຕິບັດຄືແນວໃດ ?

5). ການແບ່ງຄວາມຮັບຜິດຊອບໃນການຮັບແຂກຕ່າງປະເທດ ລະຫວ່າງຫ້ອງວ່າການແຂວງ ກັບພະແນກການ ຕ່າງປະເທດ ບັນດາແຂວງ ເຮັດຄືແນວໃດ ?

ຂໍ້ສະເໜີ:

1). ສະເໜີກໍານົດກົນໄກການປະສານງານ 4 ແຂວງ ນໍາກັນ

2). ສະເໜີ 4 ແຂວງ ຮ່ວມກັນສະເໜີຫ້ອງວ່າການສູນກາງພັກ, ຫ້ອງວ່າການສໍານັກງານນາຍົກລັດຖະມົນຕີ ມາຝຶກອົບຮົມວຽກງານວິຊາສະເພາະ, ຈະຈັດຢູ່ແຂວງໃດກໍ່ໄດ້

3). ກົນໄກການແລກປ່ຽນບົດຮຽນເຫັນຄວນຈັດເປັນແຕ່ລະປີເປັນປົກກະຕິ, ເວລາແລກປ່ຽນບົດຮຽນໃຫ້ເຈົ້າພາບເປັນຜູ້ສັງລວມລາຍງານຜົນສໍາເລັດວຽກງານຂອງ 4 ແຂວງ ແລະ ໃຫ້ກໍານົດຫົວຂໍ້ທີ່ຈະແລກປ່ຽນ.

4). ສະເໜີໃຫ້ອົງການຈັດຕັ້ງມະຫາຊົນຂອງ 4 ແຂວງ ມີການແລກປ່ຽນບົດຮຽນ, ແຮກສ່ຽວຮ່ວມມືກັນພັດ ທະນາວຽກງານວິຊາສະເພາະ.

+ ແຂວງສາລະວັນມີຄໍາເຫັນແລກປ່ຽນເອກະພາບກັບຄໍາເຫັນແລກປ່ຽນ ແລະ ຂໍ້ສະເໜີ ນໍາແຂວງເຊກອງ.

ປະທານກອງປະຊຸມໄດ້ມີຄໍາເຫັນເຈາະຈີ້ມໃຫ້ບັນດາທ່ານ ຜູ້ເຂົ້າຮ່ວມກອງປະຊຸມປະກອບຄໍາເຫັນ ດັ້ງນີ້:

1). ການກະກຽມກອງປະຊຸມອົງການປົກຄອງແຂວງ ແລະ ກອງປະຊຸມຄະນະບໍລິຫານງານພັກແຂວງ ບັນດາແຂວງ ເຮັດຄືແນວໃດ ?.

2). ວຽກກໍ່ສ້າງຮາກຖານການເມືອງ ໂດຍສະເພາະແມ່ນດ້ານງົບປະມານໃນການກະທົບໃສ່ແຜນຍຸດທະສາດ, ບັນດາໂຄງການຕ່າງໆ ບັນດາແຂວງໄດ້ມີບົດຮຽນຄືແນວໃດ ?.

3). ກົນໄກການຊຸກຍູ້ວຽກ 2 ວາລະແຫ່ງຊາດ ບັນດາແຂວງ ໄດ້ມີກົນໄກຄືແນວໃດ

4). ການແບ່ງຄວາມຮັບຜິດຊອບໃນການຮັບແຂກຕ່າງປະເທດ ລະຫວ່າງຫ້ອງວ່າການແຂວງ ກັບພະແນກ ການ ຕ່າງປະເທດ ບັນດາແຂວງ ເຮັດຄືແນວໃດ ?

5). ຫົວຂໍ້ອື່ນໆ

ໃນກອງປະຊຸມ ໄດ້ມີການປະກອບຄໍາຄິດຄໍາເຫັນ ຈາກຄະນະນໍາ, ບັນດາຂະແໜງການ ຂອງຫ້ອງວ່າການແຂວງ ຈໍາປາສັກ, ເຊກອງ, ສາລະວັນ ແລະ ອັດຕະປື ຢ່າງກົງໄປກົງມາ, ອະທິບາຍການຈັດຕັ້ງປະຕິບັດວຽກງານ ຂອງຂະແໜງ ຕົນເອງ ຕາມຄໍາເຫັນເຈາະຈີ້ມ ຊິ່ງເຫັນໄດ້ອັນຄ້າຍຄືກັນ ແລະ ມີລັກສະນະແຕກຕ່າງກັນ ທີ່ເປັນບົດຮຽນໃຫ້ແຕ່ລະແຂວງ ນໍາໄປເປັນບົດຮຽນໃນການປັບປຸງວຽກງານ ໃຫ້ມີຄວາມເຂັ້ມແຂງ ເທື່ອລະກ້າວ.

ຜ່ານການແລກປ່ຽນບົດຮຽນໃນຫົວຂໍ້ຕ່າງໆ, ກອງປະຊຸມໄດ້ມີຄວາມເຫັນດີເປັນເອກະພາບໃນການຮ່ວມມືກັນໃນຕໍ່ໜ້າ ໂດຍກໍານົດເປັນຫລັການ ດັ່ງນີ້:

1. ເຫັນດີສືບຕໍ່ຈັດກອງປະຊຸມ ພົບປະແລກປ່ຽນບົດຮຽນ ວຽກງານຫ້ອງວ່າການແຂວງ ປີລະຄັ້ງ; ສຳລັບຄັ້ງທີ 3 ໂດຍແມ່ນ ຫ້ອງວ່າການແຂວງ ຈໍາປາສັກ ເປັນເຈົ້າພາບຈັດໃນປີ 2023 ແລະ ບັນດາຫ້ອງວ່າການແຂວງ ເຫັນດີສະ ໜັບສະໜູນງົບປະມານຊ່ວຍແຂວງ ເຈົ້າພາບ 10.000.000 ກີບ ( ສິບລ້ານກີບ ).

2. ກອງປະຊຸມເຫັນດີເປັນເອກະພາບ ສ້າງກົນໄກປະສານງານ ດ້ວຍການສ້າງກຸ່ມ WhatsApp ຄະນະຫ້ອງວ່າການແຂວງ, ບັນດາຂະແໜງ ຂອງຫ້ອງວ່າການ 4 ແຂວງ ເພື່ອປະສານງານດ້ານວຽກງານຕ່າງໆ ແລະ ແລກປ່ຽນຂໍ້ມູນຂ່າວສານຮ່ວມກັນ.

3. ກອງປະຊຸມ ເຫັນດີໃຫ້ແຂວງຈໍາປາສັກ ເປັນເຈົ້າພາບກະກຽມກໍານົດຫົວຂໍ້, ປະສານກັບສູນກາງ ເພື່ອຈັດຝຶກອົບຮົມ ດ້ານວຽກງານວິຊາສະເພາະ ຮ່ວມກັນ 4 ແຂວງພາກໃຕ້ ໂດຍເຊີນເອົາວິທະຍາກອນຈາກສູນກາງຝຶກອົບຮົມໃຫ້ ເຊີນເອົາ 3 ແຂວງ: ອັດຕະປື, ເຊກອງ ແລະ ສາລະວັນ ເຂົ້າຮ່ວມນໍາ. ດ້ານງົບປະມານໃຊ້ຈ່າຍໄປມາ ໃຫ້ແຕ່ລະແຂວງຮັບຜິດຊອບເອງ, ເຈົ້າພາບຮັບຜິດຊອບຄ່າຄູຝຶກ ແລະ ອາຫານຫວ່າງ.

ວາລະພົບປະກິລາ: ງານແຂ່ງຂັນກິລາຟຸດຊໍ ແລະ ດຶງເຊືອກໄດ້ເປີດຂຶ້ນທີ່ເດີນຫລັກ 4 ເລີ່ມເວລາ 15:00 ໂມງ ໃຫ້ກຽດເຂົ້າຮ່ວມໃນພິທີເປີດມີ ທ່ານ ທະນູໄຊ ບັນຊາລິດ ຄະນະປະຈໍາພັກແຂວງ, ຮອງເຈົ້າແຂວງອັດຕະປື, ທ່ານ ໂສມ ບຸດຕາກຸນ ຄະນະປະຈໍາພັກແຂວງ, ຮອງເຈົ້າແຂວງຈໍາປາສັກ, ທ່ານ ສຸລິຈັນ ພອນແກ້ວ ກໍາມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການ ແຂວງອັດຕະປື, ທ່ານ ປອ. ວັນນະໄຊ ຊາດຕະກຸນ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການແຂວງ ຈໍາປາສັກ, ມີທ່ານ ສີສຸພັນ ມະຫາວົງ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການແຂວງເຊກອງ; ມີທ່ານ ສົມໃຈ ບຸດສະຫານິມິດ ຄະນະພັກຮາກຖານ, ຮອງຫົວໜ້າ ຫ້ອງວ່າການແຂວງ ສາລະວັນ. ມີບັນດາທ່ານ ຄະນະຫ້ອງວ່າການ, ຫົວໜ້າຂະແໜງ, ຮອງຂະ ແໜງ, ພະນັກງານວິຊາການ ທັງ 4 ແຂວງ ເຂົ້າຮວມຢ່າງພ້ອມພຽງ.

ໃນພິທີເປີດງານກິລາ ໄດ້ມີກ້ອນກໍາລັງຂອງນັກກິລາ ສອງປະເພດຈາກ 4 ແຂວງ ເຂົ້າຮ່ວມ ໂດຍມີນາງ ສາວຖືປ້າຍນໍາພາແຕ່ລະກ້ອນກໍາລັງ ເຂົ້າສູ່ພິທີເປີດກິລາເປັນທາງການ, ໃຫ້ກຽດກ່າວເປີດງານແຂ່ງຂັນໂດຍແມ່ນ ທ່ານ ສຸລິຈັນ ພອນແກ້ວ ກໍາມະການພັກແຂວງ, ເລຂາຄະນະພັກຮາກຖານ, ຫົວໜ້າຫ້ອງວ່າການແຂວງອັດຕະປື; ຈາກນັ້ນ ກໍ່ໄດ້ມີການເຕະເປີດການແຂ່ງຂັນ ໂດຍແມ່ນທີມອາວຸໂສ ແຂວງອັດຕະປື ປະສົມກັບ ແຂວງເຊກອງ ພົບກັບທີມອາວຸໂສ ແຂວງຈໍາປາສັກ ປະສົມກັບແຂວງສາລະວັນ ຜົນການແຂ່ງຂັນແມ່ນທີມອາວຸໂສ ແຂວງຈໍາປາສັກປະສົມກັບແຂວງສາລະວັນ ຊະນະ. ຜົນການແຂ່ງຂັນ ແລະ ມອບລາງວັນ ກິລາຟຸດຊໍຊາຍ ມີດັ່ງນີ້:

1. ທິມຊະນະເລີດ ຫ້ອງວ່າການແຂວງຈໍາປາສັກ ລາງວັນຂັນ 1 ໜ່ວຍ+ເງິນສົດ 1.500.000 ກີບ

2. ທີມຮອງຊະນະເລີດ ຫ້ອງວ່າການແຂວງອັດຕະປື ລາງວັນເງິນສົດ 1.000.000 ກີບ

3. ທີມທີ 3 ຫ້ອງວ່າການແຂວງສາລະວັນ ລາງວັນເງິນສົດ 700.000 ກີບ

4. ທີມທີ 4 ຫ້ອງວ່າການແຂວງເຊກອງ ລາງວັນເງິນສົດ 500.000 ກີບ

ຜົນການແຂ່ງຂັນ ແລະ ມອບລາງວັນ ກິລາດຶງເຊືອກຍິງ ມີດັ່ງນີ້:

1. ທິມຊະນະເລີດ ຫ້ອງວ່າການແຂວງເຊກອງ ລາງວັນຂັນ 1 ໜ່ວຍ+ເງິນສົດ 1.000.000 ກີບ

2. ທີມຮອງຊະນະເລີດ ຫ້ອງວ່າການແຂວງຈໍາປາສັກ ລາງວັນເງິນສົດ 800.000 ກີບ

3. ທີມທີ 3 ຫ້ອງວ່າການແຂວງອັດຕະປື ລາງວັນເງິນສົດ 600.000 ກີບ

4. ທີມທີ 4 ຫ້ອງວ່າການແຂວງສາລະວັນ ລາງວັນເງິນສົດ 400.000 ກີບ

ກ່ອນປິດງານພົບປະກິລາໃນຄັ້ງນີ້, ພາຍຫລັງທີ່ໄດ້ມອບລາງວັນ ປະເພດຕ່າງໆແລ້ວ, ໃນນາມຫ້ອງວ່າການ ແຂວງອັດຕະປື ເປັນເຈົ້າພາບ ຈັດງານພົບປະແລກປ່ຽນ ຄັ້ງທີ 2 ໄດ້ມອບທຸງຮອບວຽນ ເຈົ້າພາບ ຄັ້ງທີ 3 ໃຫ້ຫ້ອງວ່າ ການແຂວງ ຈໍາປາສັກ ໃນປີ 2023 ຢ່າງສົມກຽດ.

ຂ່າວ: ວິໄລສັກ