ໃນຕອນບ່າຍຂອງວັນທີ 17 ຕຸລາ 2018 ທີ່ຫ້ອງເຮັດວຽກ ເບີ 306 ຕຶກສໍານັກງານອົງການປົກຄອງແຂວງ ໄດ້ມີພິທີ ມອບ-ຮັບ ໜ້າທີ່ລະຫວ່າງ ສະຫາຍ ລິດຄໍາ ໂຮມອິນຕາ ເລຂາຄະນະຊາວໜຸ່ມຮາກຖານ ຫ້ອງວ່າການແຂວງ ຜູ້ເກົ່າ ແລະ ສະຫາຍ ເພັດຈິນດາ ແກ້ວຫຼວງໂຄດ ເລຂາຄະນະຊາວໜຸ່ມຮາກຖານ ຫ້ອງວ່າການແຂວງ ຜູ້ໃໝ່ ໂດຍການໃຫ້ກຽດເຂົ້າຮ່ວມເປັນສະຂີພິຍານ ແລະ ເປັນປະທານ ຂອງ ສະຫາຍ ນາງ ບັນໄດ ໄຊຍະສິດ ຄະນະພັກຮາກຖານ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ທັງເປັນຫົວໜ້າ ຂະແໜງກວດກາ-ປະເມີນຜົນ ຫ້ອງວ່າການແຂວງ ມີການນໍາອົງການຈັດຕັ້ງກໍາມະບານ, ແມ່ຍິງ ແລະ ຄະນະຊາວໜຸ່ມຮາກຖານຫ້ອງວ່າການແຂວງເຂົ້າຮ່ວມ.

 

   ໂອກາດດັ່ງກ່າວ ສະຫາຍ ລິດຄໍາ ໂຮມອິນຕາ ເລຂາຄະນະຊາວໜຸ່ມຮາກຖານ ຫ້ອງວ່າການແຂວງ ຜູ້ເກົ່າ ໄດ້ມີລາຍງານສະຫຼຸບຕີລາຄາໂດຍຫຍໍ້ ໃນການຊີ້ນໍາ-ນໍາພາ ຂອງຕົນໃນຊຸມປີຜ່ານມາ ເຊິ່ງເຫັນໄດ້ເຖິງຜົນສໍາເລັດໃນຫຼາຍດ້ານ ແລະ ຂໍ້ຄົງຄ້າງຈໍານວນໜຶ່ງ ຂະນະດຽວກັນກໍ່ໄດ້ມອບວຽກງານຄະນະຊາວໜຸ່ມຮາກຖານ ໃຫ້ຄະນະຊາວໜຸ່ມຮາກຖານຊຸດໃໝ່ໃນປະຈຸບັນ ເປັນຜູ້ສືບຕໍ່ຊີ້ນໍາ-ນໍາພາ ໃຫ້ມີຜົນສໍາເລັດໃໝ່ໃຫຍ່ຫຼວງກວ່າເກົ່າ. ພ້ອມນັ້ນຍັງໄດ້ຮັບຟັງການໂອ້ລົມຂອງ ສະຫາຍ ນາງ ບັນໄດ ໄຊຍະສິດ ຄະນະພັກຮາກຖານ, ຜູ້ຊີ້ນໍາວຽກງານອົງການຈັດຕັ້ງມະຫາຊົນ ຫ້ອງວ່າການແຂວງ ເຊິ່ງທ່ານໄດ້ຮຽກຮ້ອງໃຫ້ ຄະນະຊາວໜຸ່ມຮາກຖານຫ້ອງວ່າການແຂວງ ຊຸດໃໝ່ໃນປະຈຸບັນ ສືບຕໍ່ຊີ້ນໍາ-ນໍາພາ ດ້ວຍຄວາມເປັນເຈົ້າການ ເພີ່ມທະວີຄວາມສາມັກຄີ ຢ່າງໜັກແໜ້ນ, ມີແຜນການ ແລະ ແບ່ງຄວາມຮັບຜິດຊອບວຽກງານຢ່າງຈະະແຈ້ງ ເພື່ອໃຫ້ການປະຕິບັດໜ້າທີ່ວຽກງານ ໂດຍສະເພາະວຽກງານ 4 ບຸກ ຂອງຊາວໜຸ່ມ ໃຫ້ມີຜົນສໍາເລັດເປັນກ້າວໆ.