banner 11.2017

ໜອງຟ້າມະຫັດສະຈັນ

nongfa

ຄົ້ນຫາພາທ່ຽວ ອັດຕະປື

tour 2018

ສະຖິຕິ ຜູ້ເຂົ້າຊົມເວັບໄຊ

ມື້ນີ້:ມື້ນີ້:406
ມື້ວານນີ້:ມື້ວານນີ້:454
ອາທິດນີ້:ອາທິດນີ້:860
ເດືອນນີ້:ເດືອນນີ້:9291
ທັງໝົດ:ທັງໝົດ:919074

Lao National Radio

radio

ແຜນທີແຂວງ ອັດຕະປື

administrative map

 

 

 

ເຈົ້າແຂວງຍົກ 5 ບັນຫາໃນ 8 ວຽກຈຸດສຸມ 2024

ໃນໂອກາດທີ່ນາຍົກລັດຖະມົນຕີລົງມາເຄື່ອນໄຫວຊຸກຍູ້ວຽກງານ ຢູ່ອັດຕະປື

ໃນວັນທີ 3 ເມສາ 2024 ນີ້, ທ່ານ ສອນໄຊ ສີພັນດອນ ກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະປະກອບມີລັດຖະມົນ ຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງແຜນການ ແລະ ການລົງທຶນ, ກະຊວງໂຍທາທິການ ແລະ ຂົນສົ່ງ, ຫົວໜ້າກົມ-ຮອງກົມກ່ຽວຂ້ອງຈາກສູນກາງ ໄດ້ລົງເຄື່ອນໄຫວຢ້ຽມຢາມຊຸກຍູ້ວຽກງານຢູ່ອັດຕະປື ໂດຍການຕ້ອນຮັບຢ່າງອົບອຸ່ນຈາກ ທ່ານ ພົທ ວັນທອງ ກອງມະນີ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ອັດຕະປື ພ້ອມດ້ວຍຄະນະ, ພິທີດັ່ງກ່າວໄດ້ມີຂຶ້ນທີ່ຫໍປະຊຸມໃຫຍ່ຂອງແຂວງ ປະກອບມີພະນັກງານການນຳຫຼັກແຫຼ່ງຂອງແຂວງ, ກຳລັງ ປກສ-ປກຊ, ອາດີດການນຳ ແລະ ຄະນະພັກ-ຄະນະນຳໃນທົ່ວແຂວງເຂົ້າຮ່ວມຮັບຟັງ.

ການມາເຄື່ອນໄຫວຊຸກຍູ້ວຽກງານຢູ່ແຂວງ ອັດຕະປື ຂອງ ທ່ານ ນາຍົກ ພ້ອມຄະນະ ຄັ້ງນີ້ ທ່ານ ພົທ ວັນທອງ ກອງມະນີ ເຈົ້າແຂວງ ອັດຕະປື ໄດ້ລາຍງານໂດຍຫຍໍ້ ແລະ ຍົກໃຫ້ເຫັນຜົນສໍາເລັດໃນຫລາຍດ້ານ ເປັນຕົ້ນ ຜ່ານມາທົ່ວແຂວງຍັງສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບສຸກ, ຄວາມເປັນລະບຽບຮຽບຮ້ອຍໂດຍພື້ນຖານ, ການນໍາ ພັກ-ລັດ ທຸກຂັ້ນໄດ້ເພີ່ມທະວີໃຫ້ຄວາມເອົາໃຈໃສ່ ນໍາພາ-ຊີ້ນຳປະຊາຊົນທ້ອງຖິ່ນເຮັດການຜະລິດ, ປັບປຸງກໍ່ສ້າງກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ດ້ານເສດຖະກິດຍັງໄດ້ຮັບການຂະຫຍາຍຕົວຢ່າງຕໍ່ເນື່ອງ ໃນນັ້ນ ສຳລັບທິດທາງແຜນການນໍາພາ-ຊີ້ນໍາວຽກງານຈຸດສຸມປີ 2024 ເຈົ້າແຂວງໄດ້ຍົກໃຫ້ເຫັນ 5 ບັນຫາໃນ 8 ວຽກຈຸດສຸມສະເໜີລັດຖະບານນຳໄປພິຈາລະນາ ເພື່ອຄວາມເປັນເອກະພາບກັບທ້ອງຖິ່ນຄື:1) ສືບຕໍ່ເລັ່ງກໍ່ສ້າງເສັ້ນທາງ 18 A ໄລຍະ 2 ແຕ່ຫົວຂົວຫ້ວຍອຸກຫາເທດສະບານແຂວງ ໃຫ້ສຳເລັດພາຍໃນຕົ້ນເດືອນ 6 ປີ 2024 ແລະ ສຸມໃສ່ປະຕິບັດໂຄງການ ໄລຍະ 3 ໃຫ້ມີຄວາມຄືບໜ້າ, 2) ສືບຕໍ່ແກ້ໄຂບັນຫາຄ່າຊົດເຊີຍທີ່ໄດ້ຮັບຜົນກະທົບ ຈາກສັນເຂື່ອນເຊປຽນເຊນ້ຳນ້ອຍແຕກ ຢູ່ເມືອງສະໜາມໄຊ (ລາຍການທີ 6) ໃຫ້ສໍາເລັດໃນເດືອນ 6 ປີ 2024, 3) ສືບຕໍ່ແກ້ໄຂບັນຫາການບຸກລຸກທີ່ດິນປ່າໄມ້ເຂດເມືອງສະໜາມໄຊໃຫ້ແຂງແຮງ, ເຂັ້ມງວດຕາມລະບຽບກົດໝາຍ ແລະ ສຸມໃສ່ຈັດສັນທີ່ດິນທໍາການຜະລິດໃຫ້ປະຊາຊົນຄືນໃໝ່, ກໍານົດເຂດດິນສະຫງວນຂອງລັດເພື່ອຟື້ນຟູປ່າ ແລະ ເຂດເຊົ່າ-ສໍາປະທານໃຫ້ນັກລົງທຶນເພື່ອການພັດທະນາຢ່າງມີຈຸດສຸມ, 4) ສືບຕໍ່ປະສານສົມທົບກັບພາກສ່ວນກ່ຽວຂ້ອງເພື່ອຈັດສັນຟື້ນຟູປ່າໄມ້ເຂດເຊພະ-ເຊປ່ອງໄລ ໂດຍແມ່ນບໍລິສັດ ຮົງກົງທຽນຊື່ ສະໜອງທຶນໃຫ້ ແລະ 5) ສຶບຕໍ່ຊຸກຍູ້ການປະຕິບັດບົດບັນທຶກສັນຍາ ແລະ ການຮ່ວມມືກັບບັນດາແຂວງພາກກາງ ແລະ ພາກໃຕ້ຂອງ ສສ ຫວຽດນາມບາງແຂວງ ສປ ຈີນ, ບັນດາແຂວງໃກ້ຄຽງຣາຊະອານາຈັກກໍາປູເຈຍ ຕິດພັນກັບການແກ້ໄຂບັນຫາຊາຍແດນຄົງຄ້າງໃຫ້ໂລ່ງລຽນ ແລະ ໜັກແໜ້ນ; ພ້ອມນັ້ນ, ສືບຕໍ່ຜັນຂະຫຍາຍ​ຜົນສໍາເລັດກອງ​ປະ​ຊຸມ​ຄະ​ນະ​ປະ​ສານ​ງານ​ຮ່ວມ​ເຂດ​ສາມຫຼ່ຽມ​ພັດ​ທະ​ນາ ກຳ​ປູ​ເຈຍ-ລາວ-ຫວຽດ​ນາມ ( CLV ) ຄັ້ງ​ທີ 13 ໃຫ້ໄດ້ຮັບຜົນດີ.

ໂອກາດດຽວກັນນີ້ ທ່ານນາຍົກລັດຖະມົນຕີ ກໍໄດ້ໂອ້ລົມ ໂດຍຊຸກຍູ້ໃຫ້ໃຫ້ຄະນະພັກ-ຄະນະນໍາ ແລະ ພະນັກງານຫຼັກແຫຼ່ງຂອງແຂວງສືບຕໍ່ເອົາໃຈໃສ່ນໍາພາ-ຊີີ້ນໍາວຽກງານປ້ອງກັນຊາດ, ປ້ອງກັນຄວາມສະຫງົບ; ເພີີ່ມທະວີການແກ້ໄຂປະກົດການຫຍໍ້ທໍ້ຕ່າງໆ ໃນສັງຄົມໃຫ້ຫຼຸດລົງ; ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ກໍຄືແຜນພັດທະນາເສດຖະກິດ-ສັງຄົມແຫ່ງຊາດ ໃຫ້ມີການຫັນປ່ຽນຢ່າງຕັ້ງໜ້າ; ສືບຕໍ່ພັດທະນາດ້ານການທ່ອງທ່ຽວ ແລະ ການບໍລິການ ໃຫ້ມີຄຸນນະພາບດີ ແລະ ຍືນຍົງ; ສືບຕໍ່ຍົກສູງຄວາມຮັບຜິດຊອບໃນການຍົກສູງສະຕິລະວັງຕົວ, ຕ້ານປະກົດການທີີ່ບໍ່ຖືກຕ້ອງ ແລະ ເດັດດ່ຽວໃນການປະຕິບັດແນວທາງນະໂຍບາຍຂອງພັກ; ສືບຕໍ່ເລັ່ງທວງໃຫ້ຄະນະຮັບຜິດຊອບຂັ້ນແຂວງກວດກາຄືນໂຄງການກໍ່ສ້າງນຳປະປາໃນເຂດປະຊາຊົນໄພພິບັດຢູ່ອາໄສໃຫ້ສຳເລັດໂດຍໄວ, ຂະແໜງການກ່ຽຂ້ອງສືບຕໍ່ປະສານກັບຄະນະວິຊາການຂັ້ນສູນກາງໃນໂຄງການກໍ່ສ້າງເສັ້ນທາງ 18 A ໃຫ້ໄດ້ຮັບມາດຕາຖານ ແລະ ສ້ອມແປງເສັ້ນທາງປູຢາງທີ່ເປະເພໃຫ້ໄດ້ຮັບປະກັນຄວາມປອດໄພ, ຊຸກຍູ້ສົ່ງເສີມປະຊາຊົນເພີ່ມພູນການຜະລິດກະສິກຳເປັນສິນຄ້າໃຫ້ຫຼາຍ, ເອົາໃຈໃສ່ຈັດຕັ້ງປະຕິບັດບັນດາມາດຕະການ, ແຜນເຄື່ອນ ໄຫວວຽກຈຸດສຸມ ແລະ ບັນດາເນື້ອໃນນິຕິກໍາ ທີ່ໄດ້ກໍານົດ ໃຫ້ມີປະສິດທິຜົນ ແລະ ເປັນຮູບປະທໍາຕົວຈິງຢ່າງແຂງແຮງ, ສືບຕໍ່ຄຸ້ມຄອງລາຍຮັບ-ລາຍຈ່າຍຢ່າງຮັດກຸມຕາມທິດປະຢັດຢ່າງເປັນຮູບປະທຳ ພ້ອມນີ້ຍັງໄດ້ຊີ້ນຳວຽກງານກ້ານອື່ນໆຕື່ມອີກ...\

ໃນວັນດຽວກັນ, ທ່ານນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ໄປເຄື່ອນໄຫວຢ້ຽມຢາມໂຮງງານຜະລິດແປ້ງມັນຕົ້ນຂອງ ບໍລິສັດ (ຮົງກົງທຽນຊື່) ແລະ ຢ້ຽມຢາມຊົມຖານທີ່ໝັ້ນເຂດປະຕິວັດລາວໃຕ້ຢູ່ເມືອງສະໜາມໄຊ ແລະ ໂຄງການກໍ່ສ້າງຈຳນວນໜຶ່ງ.