banner 11.2017

ໜອງຟ້າມະຫັດສະຈັນ

nongfa

ຄົ້ນຫາພາທ່ຽວ ອັດຕະປື

tour 2018

ສະຖິຕິ ຜູ້ເຂົ້າຊົມເວັບໄຊ

ມື້ນີ້:ມື້ນີ້:58
ມື້ວານນີ້:ມື້ວານນີ້:449
ອາທິດນີ້:ອາທິດນີ້:1411
ເດືອນນີ້:ເດືອນນີ້:10764
ທັງໝົດ:ທັງໝົດ:892226

Lao National Radio

radio

ແຜນທີແຂວງ ອັດຕະປື

administrative map

 

 

ແຂວງ ອັດຕະປື ເປີດງານວາງສະແດງສິນຄ້າ, ການລົງທຶນ ແລະ ການທ່ອງທ່ຽວ

ເຂດ 3 ຫຼ່ຽມ ກໍາປູເຈຍ-ລາວ- ຫວຽດນາມ ຄັ້ງທີ 13

ໃນຕອນແລງຂອງວັນທີ 27 ກຸມພາ 2024 ພະແນກອຸດສາຫະກໍາ ແລະ ການຄ້າແຂວງ ອັດຕະປື ຮ່ວມກັບ ກົມສົ່ງເສີມການຄ້າ ແລະ ຫັດຖະກໍາ, ກະຊວງອຸດສາຫະກໍາ ແລະ ການຄ້າ ໄດ້ເປັນເຈົ້າໃນການຈັດງານວາງສະແດງສິນຄ້າ, ການລົງທຶນ, ການທ່ອງທ່ຽວ ເຂດສາມຫຼ່ຽມພັດທະນາ ກໍາປູເຈຍ-ລາວ-ຫວຽດນາມ ຂຶ້ນທີ່ເດີ່ນໜ້າຫ້ອງວ່າການແຂວງ ອັດຕະປື, ເປັນກຽດເຂົ້າຮ່ວມມີ ທ່ານ ພົນໂທ ວັນທອງ ກອງມະນີ ເຈົ້າແຂວງ ອັດຕະປື ແລະ ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງ ອຸດສາຫະກໍາ ແລະ ການຄ້າ, ພ້ອມດ້ວຍບັນດາທ່ານຄະນະຜູ້ແທນຈາກສາມປະເທດ ກໍາປູເຈຍ-ລາວ-ຫວຽດນາມເຂົ້າຮ່ວມ.

ຈຸດປະສົງຂອງການຈັດງານໃນຄັ້ງນີ້ ກໍ່ເພື່ອເປັນການຂ່ຳນັບຮັບຕ້ອນ ກອງປະຊຸມຄະນະກໍາມະການຮ່ວມເຂດສາມຫຼ່ຽມພັດທະນາ ຄັ້ງທີ 13 ທີ່ແຂວງ ອັດຕະປື, ທັງເປັນການສົ່ງເສີມການພັດທະນາ-ຮ່ວມມືທາງດ້ານການຄ້າ, ການລົງທຶນ ແລະ ທ່ອງທ່ຽວ ຂອງບັນດາປະເທດ ທີ່ນອນໃນເຂດສາມຫຼ່ຽມພັດທະນາ ແນໃສ່ຂະຫຍາຍໂອກາດຊອກຫາຕະຫຼາດຈໍາໜ່າຍສິນຄ້າ ແລະ ການເປັນຄູ່ຮ່ວມມືດ້ານທຸລະກິດ-ການຄ້າໃຫ້ກວ້າງຂວງອອກ ແລະ ຍືນຍົງ, ຕິດພັນການເສີມຂະຫຍາຍນະໂຍບາຍການເຊື່ອມໂຍງດ້ານການຄ້າ, ການລົງທຶນ ແລະ ການທ່ອງທ່ຽວ, ທັງເປັນການສົ່ງເສີມສີໄມ້ລາຍມື, ພູມປັນຍາຂອງຊາວບ້ານ, ກຸ່ມຜູ້ຜະລິດ-ປຸງແຕ່ງສິນຄ້າກະສິກຳ ແລະ ຫັດຖະກຳ ຂອງປະຊາຊົນ ຕາມຊາຍແດນທີ່ຕິດຈອດກັນ ໃຫ້ມີການປັບປຸງທາງດ້ານປະລິມານ ແລະ ຄຸນນະພາບ ສາມາດຕອບສະໜອງຄວາມຕ້ອງການພາຍໃນແຂວງ, ພາຍໃນເຂດສາມຫຼ່ຽມພັດທະນາ. ພ້ອມກັນນັ້ນ ກໍຍັງເປັນການເພີ່ມທະວີການຮ່ວມມື ແລະ ການແລກປ່ຽນປ່ຽນວັດທະນະທໍາຮີດຄອງປະເພນີອັນດີງາມຂອງ 3 ຊາດ ກໍ່ຄື 13 ແຂວງ ທີ່ນອນໃນເຂດສາມຫຼ່ຽມພັດທະນາ ກໍາປູເຈຍ-ລາວ- ຫວຽດນາມ, ໃນນີ້ ລາວມີ ແຂວງ ອັດຕະປື, ຈໍາປາສັກ, ເຊກອງ, ສາລະວັນ, ກໍາປູເຈຍມີ ແຂວງ ຊຽງແຕງ, ກະແຈະ, ລັດຕະນະຄີລີ, ດົນຄີລີ ແລະ ຫວຽດນາມ ມີແຂວງ ກອນຕູມ, ຍາລາຍ, ດັກລັກ, ບິງເຟືອກ, ດັກນົງ.

ງານວາງສະແດງສິນຄ້າຄັ້ງນີ້ ມີຫົວໜ່ວຍທຸລະກິດເຂົ້າຮ່ວມທັງໝົດ 118 ຫົວໜ່ວຍ ເຊິ່ງປະກອບມີ ສປປ ລາວ 107 ຫົວໜ່ວຍ, ຣາຊະອະນາຈັກ ກໍາປູເຈຍ 6 ຫົວໜ່ວຍ ແລະ ສາທາລະນະລັດສັງຄົມນິຍົວ ຫວຽດນາມ ມີ 5 ຫົວໜ່ວຍ, ໃນນັ້ນ ສິນຄ້າທີ່ນໍາມາວາງສະແດງ ແລະ ຈຳໜ່າຍ ໃນຄັ້ງນີ້ ມີຫຼາກຫຼາຍປະເພດ ເຊັ່ນ: ສິນຄ້າກະສິກຳ, ອຸດສາຫະກຳປຸງແຕ່ງຈາກຜົນຜະລິດກະສິກຳ, ອຸດສາຫະກຳ, ສະຖາບັນການເງິນ-ທະນາຄານ. ນອກນັ້ນ, ກໍຍັງມີໂຊນ ອາຫານ ແລະ ເຄື່ອງດື່ມ ເພື່ອຮັບໃຊ້ແຂກທີ່ເຂົ້າມາທ່ຽວຊົມມີທັງໝົດ 30 ຮ້ານ, ຄາດຄະເນມູນຄ່າສິນຄ້ານໍາມາວາງສະແດງໃນຄັ້ງນີ້ ປະມານ 6 ຕື້ 800 ລ້ານກວ່າກີບ. ງານວາງສະແດງສິນຄ້າ ຄັ້ງນີ ຈະດໍາເນີນໄປຈົນຮອດວັນທີ 1 ມີນາ 2024 ຈຶ່ງຈະສິ້ສຸດລົງ ແລະ ໃນແຕ່ລະຄໍ່າຄືນກໍ່ຈະມີການແລກປ່ຽນດ້ານສິລະປະ-ວັດທະນະທໍາ ຂອງລາວ, ຫວຽດນາມ ແລະ ກໍາປູເຈຍ ທີ່ເຂົ້າຮ່ວມງານວາງສະແດງໃນຄັ້ງນີ້ນໍາອີກ.

ໂອກາດດັ່ງກ່າວໃນພິທີບັນດາແຂກທີ່ເຂົ້າຮ່ວມ ກໍໄດ້ພ້ອມກັນເປີດປ້າຍ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນຂອງການເປີດງານວາງສະແດງສິນຄ້າ, ການລົງທຶນ, ການທ່ອງທ່ຽວ ເຂດສາມຫຼ່ຽມພັດທະນາ ກໍາປູເຈຍ-ລາວ-ຫວຽດນາມ ຢ່າງເປັນທາງການ.