ອັດຕະປື ມອບ-ຮັບ ໜ້າທີ່ພະນັກງານຂັ້ນສູງລະຫວ່າງຜູ້ເກົ່າກັບຜູ້ໃໝ່

ໃນວັນທີ 5 ຕຸລາ 2023 ນີ້ ທີ່ຫໍປະຊຸມໃຫຍ່ຂອງແຂວງອັດຕະປື ໄດ້ຈັດພິທີ ມອບ-ຮັບ ໜ້າທີ່ລະຫວ່າງເລຂາຄະນະບໍລິຫານງານພັກແຂວງ, ວ່າການເຈົ້າແຂວງ ອັດຕະປື ຜູ້ເກົ່າກັບຜູ້ໃໝ່ ໂດຍໃຫ້ກຽດເປັນປະທານຂອງ ທ່ານ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ມີຄະນະນຳຂັ້ນສູນກາງ, ບັນດາທ່ານຄະນະປະຈຳພັກແຂວງ, ກຳມະການພັກແຂວງ, ເຈົ້າເມືອງ 5 ເມືອງທົ່ວແຂວງ, ຫົວໜ້າ-ຮອງຫົວໜ້າພະແນກການ, ອົງການຈັດຕັ້ງມະຫາຊົນ, ລັດວິສາຫະກິດອ້ອມຂ້າງແຂວງ, ຄະນະພັກ, ຄະນະບັນຊາ ສອງກຳລັງ ປກຊ-ປກສ ຕະຫຼອດຮອດພາກສ່ວນກ່ຽວຂ້ອງເຂົ້າຮ່ວມ.

ໃນພິທີ ຕ່າງໜ້າຄະນະຈັດຕັ້ງສູນກາງພັກໄດ້ຂຶ້ນຜ່ານຄຳສັ່ງຂອງກົມການເມືອງສູນກາງພັກ ເລກທີ 10/ກມສພ, ມະຕິຕົກລົງຂອງກົມການເມືອງສູນກາງພັກ ເລກທີ 23/ກມສພ, ລົງວັນທີ 27/ກັນຍາ/2023 ແລະ ມະຕິຕົກລົງກ່ຽວຂ້ອງຈຳນວນໜຶ່ງ ທີ່ກ່ຽວຂ້ອງກັບການສັບປ່ຽນພະນັກງານຂັ້ນສູງຂອງພັກ ເຊິ່ງໃນນີ້ໄດ້ຍົກຍ້າຍ ແລະ ແຕ່ງຕັ້ງ ທ່ານ ເລັດ ໄຊຍະພອນ ກຳມະການສູນກາງພັກ ເລຂາພັກແຂວງ ເຈົ້າແຂວງຜູ້ເກົ່າ ໄປຮັບໜ້າທີ່ໃໝ່ຢູ່ສູນກາງສະຫາພັນກຳ ມະບານລາວ, ຕົກລົງຍົກຍ້າຍ ແລະ ແຕ່ງຕັ້ງ ທ່ານ ພົຕ ວັນທອງ ກອງມະນີ ກໍາມະການສູນກາງພັກ, ຮອງເລຂາຄະນະພັກ, ຮອງລັດຖະມົນຕີກະຊວງປ້ອງກັນຄວາມສະຫງົບ ມາ​ເປັນ​ເລຂາ​ຄະນະບໍລິຫານງານພັກ​ແຂວງ-ວ່າການເຈົ້າແຂວງ​ອັດຕະປື ຄົນໃໝ່.

ນະໂອກາດທີ່ມີຄວາມໝາຍ ຄວາມສຳຄັນນີ້ ທ່ານ ເລັດ ໄຊຍະພອນ ກຳມະການສູນກາງພັກ ເລຂາພັກແຂວງ ເຈົ້າແຂວງຜູ້ເກົ່າ ກໍ່ໄດ້ລາຍງາຍໂດຍຫຍໍ້ ກ່ຽວກັບການນຳພາ-ຊີ້ນຳ ໃນອົງຄະນະພັກແຂວງ ຕະຫຼອດໄລຍະຜ່ານມາ ແມ່ນໄດ້ຮັບຄວາມເອົາໃຈໃສ່ຈາກການຈັດຕັ້ງທຸກຂັ້ນ ແລະ ໃຫ້ຄວາມໄວ້ເນື້ອເຊື່ອໃຈຈາກຂັ້ນເທິງ, ຜ່ານການປະຕິບັດໜ້າທີ່ວຽກງານທີ່ສໍາຄັນຂອງພັກ-ລັດ ເຫັນໄດ້ວ່າ: ຂົງເຂດວຽກງານ ວັດທະນະທໍາ-ສັງຄົມ, ຂົງເຂດເສດຖະກິດ ແລະ ການຜະລິດ ຢູ່ແຂວງ ອັດຕະປື ນັບມື້ນັບເຕີບໃຫຍ່ຂະຫຍາຍຕົວທາງດ້ານຈໍານວນ ແລະ ຄຸນນະພາບທີ່ໜັກແໜ້ນ ເຊິ່ງບັນດາຜົນງານງານທີ່ຈະຕ້ອງສືບຕໍ່ເສີມຂະຫຍາຍ ແລະ ບັນຫາຂໍ້ຄົງຄ້າງທີ່ຈະຕ້ອງໄດ້ສຶບຕໍ່ແກ້ໄຂນັ້ນ ແມ່ນຂໍມອບໜ້າທີ່ ໃຫ້ເຈົ້າແຂວງຄົນໃໝ່ ນຳເອົາເນື້ອໃນ ແລະ ບັນຫາສຳຄັນຕ່າງໆໄປຈັດຕັ້ງປະຕິບັດຮ່ວມກັບຄະນະພັກແຂວງສືບຕໍ່ແກ້ໄຂໃຫ້ດີຂຶ້ນ, ຈາກນັ້ນພິທີກໍ່ໄດ້ພ້ອມກັນລົງນາມເຊັນບົດບັນທືກມອບ-ຮັບຮ່ວມກັນລະຫວ່າງທ່ານເຈົ້າແຂວງ ອັຕະປືຜູ້ເກົ່າ ແລະ ວ່າການເຈົ້າແຂວງຄົນໃໝ່ຢ່າງເປັນທາງການ.

ໃນ​ໂອກາດດຽວກັນ ​ທ່ານ ປອ ບຸນທອງ ຈິດມະນີ ກຳມະການ​ກົມ​ການ​ເມືອງ​ສູນ​ກາງ​ພັກ, ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ ​ໄດ້​ໃຫ້​ກຽດ​ໂອ້​ລົມ ​ແລະ ​ໃຫ້ທິດຊີ້​ນໍາໃນ​ຄັ້ງ​ນີ້​ວ່າ: ນີ້ແມ່ນ​ເປັນ​ເລື່ອງ​ປົກກະຕິ, ​ເປັນ​ກົດ​ເກນ, ທັງ​ແມ່ນ​ຫລັກການ​ຂອງ​ພັກ​ເຮົາທີ່​ເຄີຍ​ປະຕິບັດ​ກັນ​ມາ. ໄປ​ພ້ອມໆ​ກັນ​ນີ້ ໄດ້ຮຽກຮ້ອງໃຫ້ທ່ານເຈົ້າແຂວງຄົນໃໝ່ຈົ່ງຍົກສູງຄວາມຮັບຜິດຊອບທາງດ້ານການເມືອງຢ່າງໜັກແໜ້ນ, ເອົາໃຈໃສ່ຄົ້ນຄວ້າໃຫ້ຫຼາຍຂຶ້ນ ເປັນຕົ້ນແມ່ນການກຳແໜ້ນແນວທາງນະໂຍບາຍ, ມະຕິ, ຄໍາສັ່ງ ຂອງພັກ ແລະ ກົດ ໝາຍຂອງລັດ ໃຫ້ເລິກເຊິ່ງ ເພື່ອພ້ອມກັນຈັດຕັ້ງປະຕິບັດບັນດາຄາດໝາຍຕ່າງໆທີ່ໄດ້ຮັບຮອງຢູ່ໃນກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ ກໍຄື ຜົນງານທີ່ເຈົ້າແຂວງຜູ້ເກົ່າໄດ້ມອບໝາຍນັ້ນ ໃຫ້ປະກົດຜົນເປັນຈິງ.

ພິທີອັນມີຄວາມໝາຍດັ່ງກ່າວ ທ່ານ ພົຕ ວັນທອງ ກອງມະນີ ກໍາມະການສູນກາງພັກ, ເລຂາ​ຄະນະບໍລິຫານງານພັກ​ແຂວງ-ຮັກສາການເຈົ້າແຂວງ​ອັດຕະປື ຄົນໃໝ່ກໍ່ໄດ້ຂຶ້ນກ່າວຮັບໜ້າທີ່ ແລະ ໃຫ້ຄຳຄຳໝັ້ນສັນຍາວ່າ ຈະສືບຕໍ່ເຈດຕະນາລົມຂອງທ່ານເຈົ້າແຂວງຜູ້ເກົ່າ ໃນການຮັກສາທ່ວງທ່າ ອັດຕາຈະເລີນເຕີບໂຕທາງດ້ານເສດຖະກິດ ຂອງແຂວງ, ການແກ້ໄຂປະກົດການຫຍໍ້ທໍ້ໃນສັງຄົມ, ບັນຫາຢາເສບຕິດ ລວມທັງການແກ້ໄຂ ຄວາມທຸກຍາກຂອງປະຊາຊົນ, ສືບຕໍ່ປົກປັກຮັກສາ ແລະ ສ້າງສາພັດທະນາ ຢູ່ແຂວງອັດຕະປື ໃຫ້ກ້າວຂຶ້ນໄປຕາມທິດທີ່ສູນກາງພັກ ກໍຄືແຂວງອັດຕະປື ວາງໄວ້.