ທ່ານ ພົນເອກ ຈັນສະໝອນ ຈັນຍາລາດ ລົງພົບປະໂອ້ລົມຜູ້ມີສິດເລືອກຕັ້ງ ບ້ານໄຊສີ ເມືອງໄຊເສດຖາ ແຂວງອັດຕະປື

ໃນຕອນເຊົ້າ ຂອງວັນທີ 8 ກຸມພາ 2021 ນີ້ ທ່ານ ພົນເອກ ຈັນສະໝອນ ຈັນຍາລາດ ກໍາມະການ ກົມການເມືອງ ສູນກາງພັກ, ລັດຖະ ມົນຕີ ກະຊວງ ປ້ອງກັນ ປະເທດ, ຄະນະ ປະຈຳ ກໍາມະການ ເລືອກຕັ້ງ ລະດັບຊາດ ພ້ອມຄະນະ ໄດ້ລົງ ເຄື່ອນໄຫວ ຕິດຕາມ - ຊຸກຍູ້ ວຽກງານ ການກະກຽມ ໃຫ້ແກ່ ບັ້ນເລືອກຕັ້ງ ສະມາຊິກ ສະພາ ແຫ່ງຊາດ ຊຸດທີ IX ແລະ ສະພາ ປະຊາຊົນ ແຂວງ ຊຸດທີ II ແລະ ໄດ້ພົບປະ ໂອ້ລົມ ຜູ້ມີສິດ ເລືອກຕັ້ງ ຢູ່ບ້ານ ໄຊສີ ເມືອງ ໄຊເສດຖາ ແຂວງ ອັດຕະປື, ໂດຍມີ ການນຳ ຂອງແຂວງ ນຳໂດຍ ທ່ານ ບຸນເສີດ ເສດທິລາດ ຄະນະ ປະຈຳ ພັກແຂວງ ຮອງເຈົ້າແຂວງ, ການນຳ ຂອງເມືອງ ນຳໂດຍ ທ່ານ ອຸດສະຫະ ກົມມະເມືອງ ຮອງ ເລຂາພັກ ເມືອງ, ພ້ອມດ້ວຍ ນາຍບ້ານ ແລະ ພໍ່ແມ່ ປະຊາຊົນ ຢູ່ບ້ານ ດັ່ງກ່າວ ເຂົ້າຮ່ວມ ຕ້ອນຮັບ ຢ່າງອົບອຸ່ນ.

ການເຄື່ອນໄຫວ ຄັ້ງນີ້ ໄດ້ຮັບຟັງ ການລາຍງານ ຄວາມພ້ອມ ຮອບດ້ານ ໃຫ້ແກ່ ບັ້ນດຳເນີນ ການເລືອກຕັ້ງ ສະມາຊິກ ສະພາ ແຫ່ງຊາດ ຊຸດທີ IX ແລະ ສະພາປະຊາຊົນ ແຂວງ ຊຸດທີ II ຢູ່ໜ່ວຍ ປ່ອນບັດ ເລືອກຕັ້ງ ດັ່ງກ່າວ, ຈາກ ເລຂາພັກບ້ານ ນາຍບ້ານໆໄຊສີ ເຊິ່ງໂດຍລວມ ເຫັນວ່າ ຄວາມພ້ອມ ແລະ ບັນດາ ໜ້າວຽກຕ່າງໆ ແມ່ນມີຜົນ ສຳເລັດ, ພໍ່ແມ່ ປະຊາຊົນ ກໍ່ຄື ຜູ້ມີສິດ ປ່ອນບັດ ເລືອກຕັ້ງ ໄດ້ຮັບການ ເຊື່ອມຊືມ ໃນການ ໃຊ້ສິດ ແລະ ໜ້າທີ່ ຂອງຕົນ ເພື່ອຄັດເລືອກ ເອົາຕົວແທນ ແຫ່ງສິດ ແລະ ຜົນຜົນປະໂຫຍດ ຂອງ ປະຊາຊົນ ບັນດາເຜົ່າ ເຂົ້າໃນ ກົງຈັກ ຂອງສະພາ ແຫ່ງຊາດ ແລະ ສະພາ ປະຊາຊົນ ແຂວງ.

ໂອກາດນີ້ ທ່ານ ພົນເອກ ຈັນສະໝອນ ຈັນຍາລາດ ກໍາມະການ ກົມການເມືອງ ສູນກາງພັກ, ລັດຖະ ມົນຕີ ກະຊວງ ປ້ອງກັນ ປະເທດ, ຄະນະ ປະຈຳ ກໍາມະການ ເລືອກຕັ້ງ ລະດັບຊາດ ໄດ້ມີ ຄຳເຫັນ ໂອ້ລົມ ຮຽກຮ້ອງ ໃຫ້ພໍ່ແມ່ ປະຊາຊົນ ຜູ້ມີສິດ ປ່ອນບັດ ເລືອກຕັ້ງ ອອກມາ ໃຊ້ສິດ ໜ້າທີ່ ຂອງຕົນ ແລະ ເປັນເຈົ້າການ ຊ່ວຍກັນ ຮັກສາຄວາມສະຫງົບ ປອດໄພ ໃຫ້ຮັບ ປະກັນ 300% ( ຮັບປະກັນ ຜູ້ມີສິດ ປ່ອນບັດ ຕື່ນຕົວ ສະໝັກໃຈ ໄປໃຊ້ສິດ ເລືອກຕັ້ງ ໃຫ້ໄດ້ 100%, ຮັບປະກັນ ບໍ່ໃຫ້ບັດຕາຍ 100% ແລະ ແຕ່ລະໜ່ວຍ ປ່ອນບັດ ແລະ ເຂດເລືອກຕັ້ງ ຕ້ອງຮັບປະກັນ ໃຫ້ມີ ຄວາມສະຫງົບ, ປອດໄພ 100% ), ເປັນເຈົ້າການ ມີສະຕິ ຕ້ານຕໍ່ ກົນອຸບາຍ ຂອງກຸ່ມຄົນ ບໍ່ຫວັງດີ ທີ່ຫວັງສ້າງຄວາມ ວຸ້ນວາຍ ແລະ ສ້າງຄວາມ ບ່ໍສະຫງົບ ໃນບ້ານເມືອງ ຂອງພວກເຮົາ, ຢ່າຫຼົງເຊື່ອ ການບິດເບືອນ ໃສ່ຮ້າຍ ປ້າຍສີ ທີ່ບໍ່ມີ ມູນຄວາມຈິງ ໂດຍສະເພາະ ການສ້າງ ກະແສບໍ່ດີ ໄປທາງລົບ ຕໍ່ພັກ-ລັດເຮົາ ໃນສື່ ສັງຄົມ ອອນລາຍ, ເຊື່ອມຊຶມ ຮຽນຮູ້ ປະຫວັດສາດ ໂດຍສະເພາະ ປະຫວັດສາດ ການຕໍ່ສູ້ ກູ້ຊາດ ຕ້ານພວກ ຈັກກະພັດ ລ່າເມືອງຂຶ້ນ ແບບເກົ່າ ແລະ ແບບໃໝ່, ຮຽນຮູ້ ແບບຢ່າງ ທີ່ດີ ແລະ ຄວາມກ້າຫານ ເສຍສະຫຼະ ເລືອດເນື້ອ, ເຫື່ອແຮງ ແລະ ສະຕິປັນຍາ ເພື່ອຊາດ ເພື່ອປະຊາຊົນ ຂອງຜູ້ນຳລາວ ເຮົາ, ພໍ່ແມ່ປະຊາຊົນ ພວກເຮົາ ໃຫ້ສືບຕໍ່ ສ້າງຄວາມ ສາມັກຄີ ຮັກແພງກັນ ໃຫ້ໜັກແໜ້ນ, ສືບຕໍ່ ຮັກສາ ສະຖຽນລະພາບ ທາງດ້ານ ການເມືອງ, ພ້ອມກັນ ປົກປັກ ຮັກສາ ແລະ ສ້າງສາພັດທະນາ ປະເທດຊາດ ໃຫ້ຈະເລີນ ຂຶ້ນເປັນກ້າວໆ.