ເນື່ອງໃນ ໂອກາດ ວັນປູກ ຕົ້ນໄມ້ ແຫ່ງຊາດ, ໃນວັນທີ 1 ມິຖຸນາ 2020 ແຂວງ ອັດຕະປື ໄດ້ຈັດ ພິທີ ປູກຕົ້ນໄມ້ ຢູ່ທີ່ ສວນອະນຸ ສາວະລີ ແຫ່ງຊາດ ພະເຈົ້າ ໄຊຍະ ເສດຖາ ທິລາດ ທີ່ບ້ານ ຫາດຊາຍຂາວ ເມືອງ ໄຊເສດຖາ ແຂວງ ອັດຕະປື ທີ່ກໍາລັງ ກໍ່ສ້າງ ໃກ້ຈະ ສໍາເລັດ ໃນມໍໆນີ້, ໃຫ້ກຽດ ເຂົ້າຮ່ວມ ໃນພິທີ ໂດຍ ທ່ານ ເລັດ ໄຊຍະພອນ ເລຂາພັກ ແຂວງ - ເຈົ້າແຂວງ ອັດຕະປື, ມີ ຄະນະນໍາ ຂັ້ນແຂວງ, ຫົວຫນ້າ ພະແນກການ ທຸກພາກສ່ວນ, ບໍລິສັດ ຜູ້ພັດທະນາ ໂຄງການ ກໍ່ສ້າງ, ນັກຮຽນ - ນັກສຶກສາ, ອໍາ ນາດ ການປົກຄອງ ເມືອງ ແລະ ອຳນາດ ການປົກຄອງ ບ້ານ ເຂົ້າຮ່ວມ ຢ່າງເປັນ ຂະບວນ ຟົດຟື້ນ.

ພິທີ ປູກຕົ້ນໄມ້ ຄັ້ງນີ້ ໄດ້ປະດັບໃສ່ ສວນອະນຸ ສາວະລີ ແຫ່ງຊາດ ພະເຈົ້າ ໄຊຍະ ເສດຖາ ທິລາດ ແລະ ຖືເປັນວັນ ທີ່ມີ ຄວາມສໍາຄັນ ອັນຫຍິ່ງໃຫຍ່ ຂອງຊາດ ທັງ ເປັນ ວັນເດັກນ້ອຍ ສາກົນ ແລະ ວັນສິ່ງ ແວດລ້ອມ ໂລກ ທີ່ໄດ້ ເຄີຍຈັດຂຶ້ນ ໃນທຸກໆປີ ເພື່ອ ສືບຕໍ່ ປູກຈິດ ສໍານຶກ ໃຫ້ທົ່ວ ປວງຊົນ ຊາວແຂວງ ອັດຕະປື ໄດ້ເຂົ້າໃຈ ໃນການ ອະນຸລັກ ປົກປັກ ຮັກສາ ສະພາບ ເເວດລ້ອມ ໃຫ້ມີ ຄວາມອຸດົມ ສົມບູນ, ປົກປັກ ຮັກສາ ທໍາມະຊາດ ໃຫ້ຍືນຍົງ ແລະ ບັນລຸ ຄາດຫມາຍ ໃນປີ 2020 ໃຫ້ພື້ນທີ່ ປ່າໄມ້ ສີຂຽວ ພາຍໃນ ປະເທດ ກວມເຖິງ 70% ຂອງເນື້ອທີ່ ທັງຫມົດ ເວົ້າລວມ; ເວົ້າສະເພາະ ໃນພື້ນທີ່ ສວນອະນຸ ວະລີ ແຫ່ງຊາດ ພະເຈົ້າ ໄຊຍະ ເສດຖາ ທິລາດ ໃຫ້ມີ ຄວາມສວຍ ງາມ, ສົດຊື່ນ ສີຂຽວ ຮົມເຢັນ ທາງດ້ານ ທໍາມະຊາດ ແລະ ສົ່ງຄຸນຄ່າ ສໍາຄັນ ຫຍິ່ງໃຫຍ່ ດ້ານປະຫວັດສາດ ອີກດ້ວຍ.

ສໍາລັບ ຕົ້ນໄມ້ ທີ່ນໍາມາປູກ ມີຕົ້ນໂພໄຮ, ຕົ້ນຄູນ, ຕົ້ນປາມ, ຕົ້ນຈໍາປາ ແລະ ຕົ້ນໄມ້ ປະດັບ ຊະນິດອື່ນໆ.