ເນື່ອງໃນປະເພນີ ບຸນຫໍ່ເຂົ້າສະຫຼາກ ສືບສານ ປະເພນີລາວ ປະຈຳປີ 2017 ເມືອງ ໄຊເສດຖາ, ແຂວງ ອັດຕະປື ໄດ້​ຈັດຂຶ້ນ ​ຢ່າງ​ເບີກບານ​ ມ່ວນຊື່ນ ໃນວັນ​ທີ 5 ກັນຍາ 2017 ເຊິ່ງໃນວັນ ດັ່ງກ່າວ ກໍ່ໄດ້​ມີການຈັດງານ ບຸນປະເພນີ ແຂ່ງຂັນເຮືອຊ່ວງ ຂຶ້ນທີ່ລຳນໍ້າ ເຊກະໝານ ໂດຍມີການນຳ ຂັ້ນແຂວງ, ເມືອງ, ​ບັນດາ​ ອົງ​ການຈັດຕັ້ງ​ກ່ຽວຂ້ອງ ຕະຫຼອດ​ຮອດ​ ພໍ່​ແມ່​ປະຊາຊົນ ​ບັນດາເຜົ່າ ເຂົ້າຮ່ວມຮັບຊົມ ຢ່າງຫຼວງຫຼາຍ. ງານ​ແຂ່ງຂັນ​ ຊ່ວງ​ເຮືອ ​ທີ່ທ່າ​ລຳນໍ້າ ເຊກະໝານ ປະຈຳ​ປີ 2017 ມີ​ເຮືອ​ຊ່ວງ ເຂົ້າ​ຮ່ວມ​ແຂ່ງຂັນ​ ທັງ​ໝົດ 20 ລຳ, ໃນ​ນັ້ນ​, ໄດ້ແບ່ງ ອອກເປັນ 3 ປະເພດ ຄື: ເຮືອ​ປະ​ເພນີ​ 22 ສີພາຍ, 12 ສີພາຍ ແລະ ເຮືອ 8 ສີພາຍ ເຊິ່ງບັນຍາກາດ ຂອງການແຂ່ງຂັນ ແມ່ນເຕັມໄປດ້ວຍ ນ້ຳໃຈນັກກິລາ ຈາກແຮງໃຈ ແຮງເຊຍ ກໍ່ຄືປະຊາຊົນ​ລາວ​ ບັນດາ​ເຜົ່າ ໃນທົ່ວເມືອງ ໄດ້​ໃຫ້​ຄວາມ​ສົນໃຈ ​ທ່ຽວຊົມ ແລະ ເລືອກ​ຊື້​ສິນຄ້າ ທີ່​ຈຳໜ່າຍ​ ໃນ​ງານ​ບຸນຕະຫຼອດ ການແຂ່ງຂັນ​ ຢ່າງ​ຄຶກຄື້ນ;

ສຳລັບຜົນຂອງ ການແຂ່ງຂັນ ເຮືອປະເພນີປະເພດ 22 ສີພາຍ ຊະນະເລີດແມ່ນ ເຮືອຈາກເມືອງ ຊານໄຊ ໄດ້ຮັບຂອງຂວັນ ຂັນໜຶ່ງໜ່ວຍ ພ້ອມເງິນສົດ 3 ລ້ານກີບ, ປະເພດ 12 ສີພາຍ ຊະນະເລີດ ແມ່ນເຮືອເມືອງ ສະໝາມໄຊ ໄດ້ຮັບລາງວັນ ຂັນໜຶ່ງໜ່ວຍ ພ້ອມເງິນສົດ 2 ລ້ານ 5 ແສນກີບ, ປະເພດ 8 ສີພາຍ ຊະນະເລີດ ແມ່ນເຮືອນາວາ ສາມອ້າຍນ້ອງ ໄດ້ຮັບລາງວັນ ຂັນໜຶ່ງໜ່ວຍ ພ້ອມເງິນສົດ 2 ລ້ານກີບ, ສ່ວນເຮືອປະເພດ 12 ສີພາຍຍິງ ຊະນະເລີດແມ່ນ ເຮືອຈາກ ບ້ານສົມໂຄດ ໄດ້ຮັບລາງວັນ ຂັນໜຶ່ງໜ່ວຍ ພ້ອມເງິນສົດ 2 ລ້ານ 5 ແສນກີບ.

ໂດຍ: ມາລາທິບ