ແຂວງອັດຕະປື ປະກາດແຕ່ງຕັ້ງ ຫົວໜ້າຄະນະຈັດຕັ້ງ ແຂວງຜູ້ໃໝ່ ພິທີປະກາດ ແຕ່ງຕັ້ງ ແລະ ມອບຮັບ ໜ້າທີ່ລະຫວ່າງ ຫົວໜ້າ ຄະນະຈັດຕັ້ງແຂວງ ຜູ້ເກົ່າ ແລະ ຜູ້ໃໝ່ ໄດ້ຈັດຂື້ນ ໃນຕອນບ່າຍ ວັນທີ 14 ເມາສາ 2017 ທີ່ຫ້ອງປະຊຸມ ຊັ້ນ 5 ສຳນັກງານ ອົງການປົກຄອງແຂວງ ໂດຍການໃຫ້ກຽດ ເຂົ້າຮ່ວມເປັນ ປະທານຂອງ ທ່ານ ປອ ນາມ ວິຍາເກດ ກຳມະການສູນກາງພັກ ເລຂາພັກແຂວງ ເຈົ້າແຂວງອັດຕະປື, ມີບັນດາທ່ານ ຫົວໜ້າ ພະແນກການ ອອ້ມຂ້າງແຂວງ ແລະ ແຂກຖືກເຊີນ ເຂົ້າຮ່ວມ. ໃນພິທີ ໄດ້ຜ່ານ ຂໍ້ຕົກລົງ ຂອງທ່ານເຈົ້າແຂວງ ວ່າດ້ວຍການ ອະນຸຍາດ ໃຫ້ທ່ານ ບຸນມີ ບຸບຜາສະຫວັນ ກຳມະການພັກແຂວງ ຫົວໜ້າ ຄະນະຈັດຕັ້ງແຂວງ ຜູ້ເກົ່າ ພັກຜ່ອນ ປິ່ນປົວສຸຂະພາບ ຍາວນານ ແລະ ບໍ່ມີກຳນົດ. ພ້ອມນັ້ນ, ກໍ່ໄດ້ຜ່ານ ມະຕິຕົກລົງ ຂອງຄະນະປະຈຳ ພັກແຂວງ ວ່າດ້ວຍການ ແຕ່ງຕັ້ງ ທ່ານ ນາງ ມີນາພອນ ໄຊຊົມພູ ຮອງເລຂາພັກແຂວງ ເປັນຫົວໜ້າ ຄະນະຈັດຕັງແຂວງ ຜູ້ໃໝ່ ພ້ອມທັງ ມີພິທີເຊັນ ບົດບັນທືກການ ມອບ-ຮັບ ໜ້າທີ່ ລະຫວ່າງ ຜູ້ປະຈຳການ ຄະນະຈັດຕັ້ງແຂວງ ແລະ ຫົວໜ້າ ຈັດຕັ້ງແຂວງ ຜູ້ໃໝ່ ຢ່າງເປັນທາງການ ໂດຍຊ່ອງໜ້າ ປະທານ ແລະ ພະແນກການ ເຂົ້າຮ່ວມ ເປັນສັກຂີພິຍານ. ຕອນທ້າຍ ຂອງພິທີ ທ່ານ ປອ ນາມ ວິຍາເກດ ກຳມະການ ສູນກາງພັກ ເລຂາຄະນະ ບໍລິຫານງານພັກແຂວງ, ເຈົ້າແຂວງອັດຕະປື ໄດ້ໃຫ້ກຽດໂອ້ລົມ ເຊິ່ງນອກຈາກທ່ານ ໄດ້ສະແດງຄວາມຊົມເຊີຍ ຕໍ່ຜົນງານ ຈັດຕັ້ງແຂວງ ຍາດມາໄດ້ ໃນໄລຍະ ຜ່ານມາແລ້ວ ທ່ານ ຍັງໄດ້ສະແດງ ຄວາມເຊື່ອໝັ້ນ ພາຍໃຕ້ການ ຊີ້ນຳ-ນຳພາ ຂອງຫົວໜ້າ ຄະນະຈັດຕັ້ງແຂວງ ຜູ້ໃໝ່ ຈະໄດ້ສືບຕໍ່ ແລະ ເພີ່ມທະວີ ຄວາມເປັນເຈົ້າການ ຄົ້ນຄ້ວາກຳແໜ້ນ ກົງຈັກການຈັດຕັ້ງ, ກຳແໜ້ນບຸກ ຄະລາກອນ ເພື່ອຈັດວາງ ໃຫ້ເປັນລະບົບ ຖືກກັບວິຊາສະເພາະ ແລະ ແທດເໝາະກັບ ສະພາບຄວາມເປັນຈິງ.