ທ່ານຮອງນາຍົກ ລັດຖະມົນຕີ ຢຽ້ມຢາມໂຄງການ ຂຸດຄົ້ນຫີນອ່ອນ ທ່ານ ສອນໄຊ ສີພັນດອນ ຮອງນາຍົກ ລັດຖະມົນຕີ ພ້ອມດ້ວຍຄະນະ ໄດ້ເດີນທາງ ໄປຢ້ຽມຢາມໂຄງການ ຂຸດຄົ້ນ ຫີນອ່ອນ ປາໂກໄດ ທີ່ພູກາງໂຮງ ເມືອງພູວົງ ໃນຕອນບ່າຍ ວັນທີ 11 ກຸມພາ 2017 ໂດຍມີ ທ່ານ ນາມ ວິຍາເກດ ເຈົ້າແຂວງ ອັດຕະປື ເປັນຜູ້ພາທາງ ໃຫ້ກຽດຕ້ອນຮັບ ຄະນະ ຂອງ ທ່ານ ຮອງນາຍົກ ລັດຖະມົນຕີ, ມີທ່ານ ອາກູ້ ເຫວີຍ ຜູ້ອຳນວຍການ ບໍລິສັດ ພັດທະນາ ຫີນປະເສີດ ລາວ-ຈີນ ຈຳກັດ ພ້ອມດ້ວຍ ພະນັກງານ, ວິຊາການ ໃຫ້ການຕ້ອນຮັບ. ໂອກາດດັ່ງກ່າວ ກໍ່ໄດ້ຮັບຟັງການ ລາຍງານ ສະພາບການ ເຄື່ອນໄຫວວຽກງານ ຂອງບໍລິສັດ ໂດຍສະເພາະແມ່ນ ວຽກງານການ ສຳຫຼວດ, ການຂຸດຄົ້ນ ແລະ ປຸງແຕ່ງ. ເຊິ່ງບໍລິສັດພັດທະນາ ຫີນປະເສີດ ລາວ-ຈີນ ຈຳກັດ ເປັນບໍລິສັດ ທີ່ສ້າງຕັ້ງຂື້ນ ຖືກຕ້ອງຕາມ ລະບຽບກົດໝາຍຂອງ ສປປ ລາວ ໂດຍແມ່ນ ການຮ່ວມມື ລະຫວ່າງ ລັດຖະບານ ລາວ ແລະ ບໍລິສັດ ປາວລີ ( ຮົງກົງ ) ເຊິ່ງຕາມສັນຍາ ທາງບໍລິສັດ ຈະໄດ້ສຳຫຼວດ, ຂຸດຄົ້ນ ແລະ ປຸງແຕ່ງຫີນອ່ອນ ປາໂກໄດ ໃນເນື້ອທີ່ 44.68 ກິໂລຕາແມັດ.

ການປະຕິບັດໂຄງການ ແມ່ນເຮັດເປັນ ແຕ່ລະໄລຍະ ຄື: ໄລຍະການສຳຫຼວດ 2 ປີ, ໄລຍະການ ສ້າງບົດວິພາກ ເສດຖະກິດ-ເຕັກນິກ ແລະ ສືກສາ ບົດວິພາກ 3 ປີ, ໄລຍະການ ກໍ່ສ້າງໂຮງງານ 3 ປີ, ໄລຍະການ ຂຸດຄົ້ນ 20 ປີ, ໄລຍະການຟື້ນຟູ ໃນການປິດບໍ່ 2 ປີ ຄາດຄະເນມູນຄ່າ ການລົງທືນ ປະມານ 73 ລ້ານ ກ່ວາໂດລາ ສະຫະລັດ ໂດຍແມ່ນ ບໍລິສັດ ຈະເປັນຜູ້ລົງທືນ 100% ໃນນີ້ ລັດຖະບານລາວ ຖືຮຸ້ນ 40% , ບໍລິສັດ 60% ນອກຈາກນີ້ ບໍລິສັດ ຍັງຕ້ອງໄດ້ ປະກອບສ່ວນ ສົມທົບທືນ ເຂົ້າໃນການ ຄຸ້ມຄອງ ແລະ ຕິດຕາມ ໂຄງການ ໃຫ້ລັດຖະບານ 4 ໝື່ນໂດລາ/ປີ, ພ້ອມທັງປະກອບສ່ວນ ພັດທະນາທ້ອງຖິ່ນ ໃຫ້ເມືອງ ແລະ ແຂວງ 2 ແສນໂດລາ/ປີ, ມອບທືນຝືກອົບຮົມ ວິຊາການ ໃຫ້ຂັ້ນສູງກາງ ແລະ ທ້ອງຖິ່ນ 2 ໝື່ນໂດລາ/ປີ, ມອບເງິນ ໃຫ້ກອງທືນ ປົກປັກຮັກສາ ສິ່ງແວດລ້ອມ 5 ພັນໂດລາ/ປີ ແລະ ເງີນຕິດຕາມ ການປະຕິບັດ ສັນຍາ 3 ໝື່ນໂດລາ/ປີ ນອກຈາກນັ້ນ, ທາງບໍລິສັດ ຍັງຈະຕ້ອງ ໄດ້ເສຍພັນທະ ອາກອນຕ່າງໆ ຕາມລະບຽບກົດໝາຍ. ໂອກາດດັ່ງກ່າວ ທ່ານ ຮອງນາຍົກ ລັດຖະມົນຕີ ໄດ້ມີຄຳເຫັນ ໂອ້ລົມ ບັນຫາສຳຄັນ ທ່ານໄດ້ຊີ້ນຳ ໃຫ້ບໍລິສັດ ເອົາໃຈໃສ່ໃນການ ມີສ່ວນຮ່ວມ ພັດທະນາທ້ອງຖິ່ນ, ສົ່ງເສີມການປະກອບ ອາຊີບຂອງ ປະຊາຊົນ ແລະ ຖືບູລິມະສິດ ໃນການຍົກລະດັບ ສີມືແຮງງານ ຂອງທ້ອງຖິ່ນ ເພື່ອສະໜອງ ແກ່ໂຄງການ ພ້ອມນັ້ນ: ກໍ່ຕ້ອງຈັດສັນ ສະຖານທີ່ເຂດສຳປະທານ ໃຫ້ມີຄວາມຈົບງາມ ເພື່ອດືງດູດ ນັກທ່ຽວທ່ອງ ໃຫ້ເຂົ້າມາທ່ຽວຊົມ ຜະລິດຕະພັນ ຫີນອ່ອນ ແລະ ທຳມະຊາດ ເຂດພູກາງໂຮງ ( ພູຫີນອ່ອນ ). ຈາກນັ້ນ, ທ່ານ ຮອງນາຍົກ ລັດຖະມົນຕີ ພ້ອມດ້ວຍຄະນະ ກໍ່ໄດ້ໄປເບິ່ງຕົ ວຈິງ ການຂຸດຄົ້ນ ສາຍແຮ່ ຫີນອ່ອນ ຕາມຈຸດຕ່າງໆ.