banner 11.2017

ໜອງຟ້າມະຫັດສະຈັນ

nongfa

ຄົ້ນຫາພາທ່ຽວ ອັດຕະປື

tour 2018

ສະຖິຕິ ຜູ້ເຂົ້າຊົມເວັບໄຊ

ມື້ນີ້:ມື້ນີ້:101
ມື້ວານນີ້:ມື້ວານນີ້:419
ອາທິດນີ້:ອາທິດນີ້:408
ເດືອນນີ້:ເດືອນນີ້:9617
ທັງໝົດ:ທັງໝົດ:195071

Lao National Radio

radio

ແຜນທີແຂວງ ອັດຕະປື

administrative map

 

 

ການປົກຄອງ, ປະຊາກອນ ແລະ ຊົນເຜົ່າ ແຂວງອັດຕະປື 

atp 17> ການປົກຄອງ: ອັດຕະປື ແບ່ງການປົກຄອງ ອອກເປັນ 5 ເມືອງ ຄື: 1. ເມືອງຊານໄຊ ຢູ່ທາງທິດ ຕາເວັນອອກ ຂອງເມືອງ ເທສະບານແຂວງ, ພື້ນທີ່ສ່ວນໝື່ງ ເປັນເຂດພູດອຍ ສູງຈາກລະດັບ ນໍ້າທະເລ ສະເລ່ຍ 800-1.560 ແມັດ ອາກາດ ໝາວເຢັນ, 2. ເມືອງສະໝາມໄຊ ຢູ່ທາງທິດ ຕາເວັນຕົກ ມີພື້ນທີ່ ຮາບພຽງ ເປັນອູ່ເຂົ້າ ອູ່ປາ, 3. ເມືອງພູວົງ ຢູ່ທາງທິດໃຕ້ ຊຶ່ງປະຊາກອນ ສວ່ນໃຫ່ຍ ເປັນເຜົ່າເບຮົາ ຫຼື ລະແວ, 4. ເມືອງໄຊເສດຖາ ຢູ່ທາງທິດ ຕາເວັນອອກ ສ່ຽງໃຕ້ ເປັນເມືອງເອກ ຂອງແຂວງ ກອ່ນປີ 1975 ແລະ 5. ເມືອງສາມັກຄີໄຊ ( ເມືອງໄໝ່ ) ໂຕເມືອງ ເທສະບານແຂວງ ຕັ້ງຢູ່ເທິງຝັ່ງຊ້າຍ ນໍ້າເຊກອງ.

11 pao> ປະຊາກອນ: ທົ່ວແຂວງ ມີຜົນລະເມືອງ 142.958 ຄົນ ( ຂໍ້ມູນປີ 2016 ); ປະກອບ ດ້ວຍ 11 ເຜົ່າຄື: ລາວ, ໂອຍ, ຍາເຫີນ, ຮາຮັກ, ເບຮົາ, ເຈັງ, ຕຮຽງ, ຢຮຸ, ແຢະ, ສະດາງ ແລະ ຕະໂອ້ຍ, ໃນນີ້ ເຜົ່າລາວມີ 36,9% ຂອງປະຊາກອນ ທັງໝົດ. ( ຜົນການ ສໍາຫຼວດ ຄອບຄົວ ທຸກຍາກ ປີ 2011 )

 

 

paobalao>> ເຜົ່າໂອຍ: ເປັນເຜົ່າໝື່ງ ໃນກຸ່ມພາສາ ມອນ-ຂະແມ, ອາໃສຢູ່ຕາມ ຕີນພູຫຼວງ, ຕີນພູຕະປາກ ບໍ່ລິເວນ ທົ່ງພຽງຂອງແຂວງ ແລະ ສ່ວນໝື່ງກໍ່ ຢູ່ເຂດເມືອງ ປາກຊອ່ງ ແຂວງຈໍາປາສັກ, ເຂົາເຈົ້າ ມີວັດທະນຳທໍາ, ປະເພນີ ເປັນຂອງຕົນ ເດັ່ນຊັດ ຈະແຈ້ງ ເຊັ່ນ: ຜູ້ຊາຍໂອຍ ແຕ່ກອ່ນ ນຸ່ງກະຕຽ່ວ ກິນເຫຼົ້າໄຫ ເປົ່າຕຮວານ, ດົນຕີຊະນິດໝື່ງ ປະຈໍາເຜົ່າ ຫຼື ທີ່ເຜົ່າລາວ ເອີ້ນວ່າ “ແຄນທວນ ຫຼື ແຄນນໍ້າເຕົ້າ” ມີພາສາ ປາກເວົ້າ ຮີດຄອງປະເພນີ, ນິທານ ພື້ນເມືອງ ເປັນຂອງຕົນເອງ. ຄັ້ງໝື່ງ ໃນອະດີດ ເຂົາເຈົ້າ ມີສິ່ງສັກສິດ ຄື: ກົກມ່ວງກະສໍ, ກົກໝາກຂາມ, ໂກນເຜິ້ງ, ດາບ, ພ້າ, ຄ້ອງລາ, ນາເລິກ ເມັດເຂົ້າໃຫຍ່ ທໍ່ໝ່ວຍ ໝາກພ້າວ ແລະ ປະຕູວຽງ ( ປະຕູໂຂງ ) ເຊິງບໍ່ມີສັດຕູໂຕໃດ ຈະສາມາດ ມາທໍາຮ້າຍ ບຽດບຽນໄດ້. ເຂົາເຈົ້າມີ ອາຊີບເຮັດນາ ປູກເຂົ້າຈ້າວ ປາສອ້ຍ ( ເຂົ້າງັນ ພັນພື້ນເມືອງ ຍາມເດືອນສາມ ປາສ້ອຍຂື້ນ ຈຶ່ງເກັບກ່ຽວ ) ມີປະເພນີ ລຽ້ງຜີ ກອ່ນການ ເຮັດນາ ແລະ ຫຼັງການ ເກັບກຽ່ວ ຢ່າງເຄັ່ງຄັດ, ນາເລິກ ເປັນຊັບສົມບັດ ອັນແສນແພງ ສືບມູນມໍລະດົກ ຕົກທອດຕໍ່ໆກັນມາ ໃນວົງຕະກຸນ ສາມາດໃຊ້ເປັນ ສິນສອດ ແຕ່ງດອງ ບໍ່ມີການຊື່-ຂາຍ ເວັ້ນແຕ່ກໍລະນີ້ ຈໍາເປັນທີ່ສຸດ ແລະ ຫາກຊື່-ຂາຍ ຕ້ອງມີການ ປົວແປງ ຮີດຄອງ ຢ່າງລະອຽດ ຮອບຄອບ. ສາມາດ ໄປຢ້ຽມຢາມ ແລະ ສຶກສາ ວິຖີຊີວິດ ເຂົາເຈົ້າໄດ້ທີ່ ເຂດຈະເລີນສຸກ, ເມືອງສາມັກຄີໄຊ ໃກ້ໆກັບ ນໍ້າຕົກ ຕາດພອກ, ເສັ້ນທາງສະດວກ ຫ່າງຈາກໂຕເມືອງ ປະມານ 12 ກມ.

>> ເຜົ່າຕຮຽງ ເຜົ່າແຢະ ແລະ ຮາຮັກ: ສວ່ນຫຼາຍ ມີຖິ່ນກໍາເນີດ ດັ່ງເດີມ ມາຈາກເມືອງ ດາກຈຶງ ແລ້ວຈຶ່ງມາຢູ່ ເມືອງຊານໄຊ, ສວ່ນໝື່ງຢູ່ ແຂວງເຊກອງ ແລະ ສາລະວັນ, ອີກສວ່ນໝຶ່ງ ອາໃສຢູ່ທີ່ບ້ານ ສີວິໄລ ໃກ້ໆຕະຫຼາດ ໃນເທສະບານ ເມືອງສາມັກຄີໄຊ ທໍາການຜະລິດ ຫັດຖະກໍາຕໍ່າຜ້າກະໂດ ຜ້າຮຽງ ດ້ວຍກີ່ແອວ ອັນເປັນເອກະລັກ ຂອງຕົນເອງ. ເຂົາເຈົ້າມັກ ຕັ້ງບ້ານເຮືອນ ລວມກັນ ເປັນຮູບ ວົງມົນອ້ອມ “ກວ້ານ” ( ສາລາບ້ານ ), ທີ່ຕັ້ງຢູ່ໃຈກາງ ມີເດີນ ເພື່ອໃຊ້ ໃນພິທີກໍາ ອັນສັກສິດ ຂອງບ້ານ ເຊັ່ນ: ຂ້າຄວາຍ ຫຼາຍໂຕ ລຽ້ງຜີ ໃນພິທີ ”ດໍໂດຣ” ( ກິນອາດ ) ຊຶ່ງຈັດຂຶ້ນ ໃນຮອບ 3 ຫຼື 5 ປີ ໂດຍອີງຕາມ ຜົນການ ເກັບກຽ່ວ, ບ່າວ-ສາວ ທີ່ແຕ່ງດອງກັນແລ້ວ ຕ້ອງນອນແຍກກັນ 9 ເດືອນ ເພື່ອປະຕິບັດ ຕາມຮີດຄອງ ປະເພນີ ຢ່າງເຄັ່ງຄັດ ແລະ ພິສູດ ຄວາມອົດທົນ ແລະ ຄວາມຮັກ ອັນບໍລິສຸດໃຈ ຂອງທັງ ສອງຝ່າຍ.

>> ເຜົ່າຍາເຫີນ: ເປັນກຸ້ມໝຶ່ງ ທີ່ມີຕົ້ນກໍາເນີດ ຢູ່ພູພຽງ ບໍລິເວນ. ຕໍານານພຶ້ນເມືອງ ອັດຕະປືວ່າ ໃນອະດີດ ເຜົ່ານີ້ ໄດ້ຮັບການ ເຊື່ອຖື ຈາກເຜົ່າ ລາວຫຼາຍ ເຖິງຂັ້ນ ມອບສິດ ອໍານາດໃຫ້ ຮັກສາການແທນ ເຈົ້າເມືອງ, ເຂົາເຈົ້າ ມີຄວາມເຊື່ອ ແລະ ນັບຖືສາສະໜາພຸດ ເປັນສວ່ນໃຫ່ຍ. ພຣະອົງແສນ ສັກສິດ ທີ່ສະຖິ ຢູ່ວັດສະແຄະ ກໍແມ່ນຄົນ ຊົນເຜົ່ານີ້ ເປັນຜູ້ນໍາມາຖວາຍ ໃຫ້ວັດຫຼວງ ເມືອງເກົ່າ; ພອ້ມດຽວກັບ ພະອົງໝື່ນ ສະຖິດ ຢູ່ວັດຫາຍໂສກ. ທຸກໆປີ ຄົນເຜົ່ານີ້ ຈະຜັດປຽ່ນ ກັນມາບວດ ເພື່ອອຸປະຖາກ ຮັກສາວັດ ແລະ ພະພຸດທະຮູບ. ເມື່ອເຖິງ ຍາມກຸດສົງການ ເຜົ່າຍາເຫີນ ຈະເປັນຜູ້ສົງ ພະພຸດທະຮູບ ກ່ອນເຜົ່າອື່ນໆ.

paolawere>> ເຜົ່າເບຮົາ: ມີປະຫວັດເລົ່າວ່າ ເຄື່ອນຍ້າຍ ມາຈາກ ພາກເໝືອ ອາໃສຢູ່ເຂດ ເມືອງໄຊເຊດຖາ, ເມືອງສາມັກຄີໄຊ, ເມືອງສະໝາມໄຊ ແຕ່ສວ່ນໃຫ່ຍ ແມ່ນຢູ່ເມືອງພູວົງ, ມັກຕັ້ງເຮືອນ ຢູ່ເຂດພູສູງ ອາໃສລໍານໍ້າ ເຮັດໄຮ່ປູກເຂົ້າ, ມີພາສາປາກເວົ້າ ແລະ ໂຕໝັງສື ເປັນຂອງຕົນ, ຕັດແຂ້ວ ເບື້ອງເທິງ ບ່ອງຫູໃຫ່ຍ ໃສ່ຕ້າງງາ ຄາບກອກ ຢາໃຫ່ຍ ສັກໝ້າລາຍ, ໃສ່ກ້ອງແຂນ, ກອ້ງຂາ, ຂັບລໍາເຈືອງ, ຕີຄ້ອງລາ ຄ້ອງຈຸ້ມ ຄ້ອງນ່ອງແນ່ງ, ຕົບກະບັ້ງ. ໃນຄອບຄົວ ຖ້າອ້າຍ ເສຍຊີວິດ ນ້ອງຊາຍ ສາມາດສືບ ຕໍ່ເອົາເມຍອ້າຍໄດ້, ແຕ່ຖ້ານ້ອງຊາຍ ເສຍຊີວິດ ອ້າຍບໍ່ມີສິດ ເອົາເມຍ ນອ້ງໄດ້.

>> ເຜົ່າສະດາງ ແລະ ເຜົ່າເຈັ້ງ: ມີຈໍານວນ ບໍ່ຫຼາຍ ມີພາສາປາກເວົ້າ ແລະ ຮີດຄອງ ປະເພນີ ຄືກັບເຜົ່າເບຮົາ. ເຜົ່າສະດາງ ຢູ່ໃນເຂດ ເມືອງພູວົງ ສ່ວນຫລາຍ ຢູ່ລຽບ ຕີນພູຫຼວງ ແລະ ສາຍເຊກອງ ໃນເຂດ ເມືອງສະໝາມໄຊ.

>> ເຜົ່າຕະໂອ້ຍ: ມີຕົ້ນກໍາເນີດ ແລະ ສວ່ນໃຫ່ຍ ຕັ້ງຢູ່ພູມລໍາເນົາ ຢູ່ເຂດເມືອງ ຕະໂອ້ຍ ແຂວງສາລະວັນ ແລະ ຢັງຢາຍ ໄປຢູ່ເຂດ ເມືອງສະມວ້ຍ ເມືອງເລົ່າງາມ ແຂວງສາລະວັນ, ເມືອງນອງ ແຂວງ ສະຫວັນນະເຂດ, ເມືອງທ່າແຕງ ແຂວງເຊກອງ, ເມືອງປາກຊອ່ງ ແຂວງຈຳປາສັກ ເຂົາເຈົ້າ ມີເຊື້ອສາຍ ຢູ່ເຂດຕາເວັນຕົກ ຂອງແຂວງ ກວາງຈິ ( ຫວງດນາມ ) ແລະ ມີຮອ່ງຮອຍ ວັດທະນະທຳ ທີ່ກຽ່ວກັບຫີນ ຊຶ່ງອາດ ຈະກຽ່ວຂ້ອງ ກັບໄຫຫີນ (ຊຽງຂວາງ) ຫີນຕັ້ງ (ຊຳເໝືອ )ເຮືອນຫີນ (ສະຫວັນນະເຂດ).

>> ເຜົ່າຢຮຸ: ມີສອງແຊງ ຄື: ຢຮຸດາກ (ອາໃສ ຢູ່ແຄມນໍ້າ) ແລະ ຢຮຸກອງ ( ອາໃສຢູ່ພູພຽງ), ກິນເຂົ້າຈ້າວ ເດີມເຊື່ອຖືຜີ, ມີພາສາ ປາກເວົ້າ ຄືກັບ ເຜົ່າຍະເຫີນ ໂອຍ, ເຈັ້ງ ແລະ ເຜົ່າເບຮົາ. ເຂົາເຈົ້າ ບໍ່ມີບ້ານ ຂອງເຜົ່າ ຕົນເອງ ໂດຍສະເພາະ ຈຶ່ງຢູ່ຮວ່ມ ກັບເຜົ່າອື່ນໆ ໃນເຂດເມືອງ ສະໝາມໄຊ. ເຜົ່າຢຮຸ ຍັງມີເມືອງ ປາກຊອ່ງ, ເມືອງບາຈຽງ ຈະເລີນສຸກ ແຂວງຈຳປາສັກ ເມືອງເລົ່າງາມ ແຂວງສາລະວັນ, ເມືອງທ່າແຕງ ແຂວງເຊກອງ.


ຄວາມເຊື່ອ, ວັດທະນະທຳ, ມູນເຊື້ອ, ປະຫວດສາດ ແລະ ຊັບພະຍາກອນທຳມະຊາດ

ls> ຄວາມເຊື່ອຖື ແລະ ບຸນປະເພນີ: ເຜົ່າລາວສວ່ນໃຫ່ຍ ຖືສາສະໝາພຸດ ສ່ວນເຜົ່າ ອື່ນໆ ຈໍານວນໝື່ງ ຖືສາສະໝາພຸດ ສວ່ນໃຫ່ຍແລ້ວ ຈະຖືຜີ ແລະ ມີພິທີກໍາ ລຽ້ງຜີຕ່າງໆ ເຊັ່ນ: ກິນຍີ່, ກິນອາດ, ກິນກະລືມ. ສວ່ນບຸນປະເພນີ ຂອງເຜົ່າລາວ ທີ່ຖືສາສະໝາພຸດ ກໍມີອັນແຕກຕ່າງ ຈາກທອ້ງຖິ່ນອື່ນ ເຊັ່ນ: ບຸນກະຖິນ ເພິ່ນເຄີຍ ຈັດຂຶ້ນພາຍຫຼັງ ບຸນກອງເຂົ້ າຫຼື ບຸນທົ່ງ (ຍາມເຂົ້າບ້ານ) ແຕ່ລະບ້ານ ຈະບໍ່ຄືກັນ. ສຳລັບບຸນ ພະເຫວດ ຫຼື ບຸນມະຫາຊາດ ແມ່ນຈັດຂຶ້ນ ພາຍຫຼັງ ບຸນປີໄໝລາວ, ແຕ່ມີບາງບ້ານ ກໍຈັດ ໃນລະຫວ່າງ ເດືອນ 3 ກ່ອນບຸນປີໄໝລາວ.

> ວັດທະນະທຳ ແລະ ວິຖີຊີວິດ ບັນດາເຜົ່າ: ເປັນອີກ ທາງເລືອກໝຶ່ງ ຂອງຜູ້ສະຫງວນມັກ ໃນການສຶກສາ, ຄົ້ນຄວ້າ ຊົນເຜົ່າວິທະຍາ, ຄວາມເຊື່ອຖື, ພາສາ, ຮີດຄອງປະເພນີ, ພິທີ່ກຳ ອາຫານທອ້ງຖິ່ນ ເຊັ່ນ: ເຜົ່າໂອຍ, ເຜົ່າເບຮົາ, ເຜົ່າຕຽງ...ທີ່ມີຄວາມ ໂດດເດັ່ນ ເປັນເອກະລັກ.

> ວີລະກຳ ແລະ ມູນເຊື່ອຮັກຊາດ: ຊາວອັດຕະປື ມີມູນເຊື່ອ ຮັກຊາດ, ຮັກບ້ານເກີດ ເມືອງນອນ, ອົງອາດ, ກ້າຫານ, ສາມັກຄີ ຕໍ່ສູ້ເດັດດຽ່ວ ໝຽວແໝ້ນ ບໍ່ຍອມຈຳນົນ, ຊື່ສັດ ແລະ ດີໃຈ. ວີລະກຳ ການຕໍ່ສູ້ ເພື່ອເອກະລາດ ແລະ ອິດສະລະພາບ ຂອງຊາວອັດຕະປື ໄດ້ກາຍເປັນມູນ ເຊື້ອສືບ ເນື່ອງກັນມາ ຂອງບັນພະພູລຸດ, ກໍຄືຣາຊະການ ເຈົ້າໄຊຍະ ເສດຖາທິຮາດ ແລະ ໃນສະໄໝ ຕໍ່ສູ້ກູ້ເອກະລາດ ຕ້ານການຮຸກຮ້ານ ຂອງຈັກກະພັດ ປົດປ່ອຍຊາດ ພາຍໃຕ້ການນຳພາ ຂອງພັກປະຊາຊົນ ປະຕິວັດລາວ ຄ.ສ 1945-1975 ໄດ້ເປັນພະຍານ ຫຼັກຖານ ປະຫວັດສາດ ທີ່ໂດດເດັ່ນ, ເປັນອະມະຕະ ແລະ ເປັນແວ່ນແຍງ ອັນຜອ່ງໃສ ໃຫ້ແກ່ຄົນຮຸ່ນຫຼັງ.

> ດ້ານປະຫວັດສາດ ເຊັ່ນ: ຮ່ອງຮອຍ ກ່ຽວກັບ ພະເຈົ້າ ໄຊຍະ ເສດຖາທິລາດ ແລະ ກ່ຽວກັບ ການຕໍ່ສູ້ ກູ້ເອກະລາດ ປົດປອ່ຍຊາດ ເຊັ່ນ: ຖານທີ່ໝັ້ນ ຂອງການ ປະຕິວັດ, ຖໍ້າບອ່ນ ເຄື່ອນໄຫວ ປິດລັບ ຂອງທ່ານ ໄກສອນ ພົມວິຫານ, ຂອງທ່ານ ຄຳໄຕ ສີພັນດອນ; ຊາກຍົນ, ລູກສອນໄຟ.

Sunrise at Attapeu> ຊັບພະຍາກອນທໍາມະຊາດ: ອັດຕະປື ອຸດົມຮັ່ງມີ ດ້ວຍຊັບໃນດິນ ສິນໃນນໍ້າ, ມີປ່າໄມ້ດັ້ງເດີມ ປົກຫຸ້ມ ກວມເຖິງ 75% ຂອງພື້ນທີ່ ທັງໝົດ; ໃນນັ້ນ, ມີປ່າສະຫງວນ ແຫ່ງຊາດ ສອງແຫ່ງ ຄື: ດົງອາມພາມ 200,000 ເຮັກຕາ ( ເຊື່ອມຕໍ່ ເຂົ້າກັບ ປ່າສະຫງວນ ແຫ່ງຊາດວິຣະໄຊ ຂອງແຂວງ ຊຽງແຕງ, ແຂວງຮັດຕະນະຄີລີ ກຳປູເຈຍ ແລະ ປ່າສະຫງວນ ແຫ່ງຊາດ ສະມໍໄຣ ແຂວງກອນຕູນ ຫວງດນາມ), ປ່າສະຫງວນ ແຫ່ງຊາດ ເຊປຽນ 240,000 ເຮັກຕາ ຮວ່ມກັບ ແຂວງຈຳປາສັກ. ຜົນປ່ານີ້ ອຸດົມດວ້ຍ ພືດພັນ, ມີຖໍ້າ, ທົ່ງທາມ, ຫ້ວຍຮອ່ງ, ໝອງບຶງ ອັນເປັນຖິ່ນ ຢູ່ອາໃສ ຂອງສັດປ່າ ນາໆຊະນິດ ທີ່ຫາຍາກ ເຊັ່ນ: ງົວປ່າ, ກະທິງ, ເມີຍຊ້າງ, ເສືອໂຄ່ງ, ແຮດ, ນົກອູມລົວ, ນົກຂຽນ ນົກຍູງ, ນົກກະຊຸມ, ແຂ້ນໍ້າຈືດ...ແລະ ອື່ນໆ. ມີແມ່ນໍ້າ ໃຫ່ຍ 7 ສາຍ ຄື: ເຊກອງ ( ສາຂາ ແມ່ນໍ້າຂອງ ຍາວ 320 ກມ) ແລະ ບັນດາສາຂາ ຂອງມັນ 6 ສາຍຄື ເຊກະໝານ, ເຊປຽນ, ນໍ້າກົກ, ເຊຊຸ ( ສາຂາ ເຊກະໝານ) ແລະ ເຊຄຳພໍ ( ສາຂາ ຂອງເຊປຽນ) ແລະ ເຊນໍ້ານອ້ຍ. ບັນດາສາຍນໍ້າ ເຫຼົ່ານີ້ ໄຫຼລິນຫຼໍ່ລຽ້ງ ໃຫ້ຜືນດິນ ຊຸ່ມຊື່ນ ແລະ ຊັບພະຍາກອນນໍ້າ ທັງເປັນແຫຼ່ງ ບົ່ມຊອ້ນ ພະລັງງານ ໄຟຟ້ານໍ້າຕົກ FB IMG 1507121104993ອັນຍິ່ງໃຫ່ຍ ທີ່ສາມາດ ພັດທະນາ ໃຫ້ກາຍ ອຸດສາຫະກໍາ ພະລັງງານໄຟຟ້າ ໃນພາກໃຕ້ລາວ. ມີສາຍພູສະພອງ ຢູ່ທິດຕາເວັນ ອອກ ແລະ ສາຍພູຫຼວງ ຢູ່ທິດ ຕາເວັນຕົກ, ນອກໃນ ລະຫວ່າງກາງ ຂອງສາຍພູນັ້ນ ແມ່ນປ່າໂຄກ ອັນກວ້າງໃຫ່ຍ ແລະ ທົ່ງພຽງ ອັນເປັນອູ່ເຂົ້າ ອູ່ປາ ຊຶ່ງໄດ້ຮັບ ການຂະໝານ ນາມວ່າ “ທົ່ງພຽງແຫ່ງ 7 ຂອງປະເທດ” ຊາວອັດຕະປື ໂດຍສະເພາະ ຜູ້ທີ່ຢູ່ລຽບຕາມ ລໍານໍ້າເຊກອງ ເຊກະໝານ ມັກຈະເຫຼົ່າເລື່ອງ ຄວາມເລິກລັບ ຂອງສາຍນໍ້າ, ເລື່ອງປາຂຶ້ນ ໃນໄລຍະ ເດືອນ 2-5, ປາກອງ ເດືອນ 5-6, ປາອອກແກ່ງ ແລະ ປາອອກແປວ ໃນເດືອນ 6-7 ວ່າມີຫຼວງຫຼາຍ ພາຍມາກ ຈົນວ່າກອງຂຶ້ນ ຢູ່ເທິງຫາດຊາຍ, ສຽງປາຮ້ອງ ດັງກອ້ງສະນັ່ນ ໃນຍາມກາງຄືນ, ຈົນວ່າໝາ ຢູ່ກາງເດີນ ບ້ານພາກັນ ເຫົ່າຫອນ-ນອນບໍ່ໄດ້. ຄົນພາກັນ ໄປເອົາປາມ່ວນ ພໍປານວ່າ ໄປເອົາບຸນ. ຜູ້ບໍ່ເຄີຍໄດ້ງິນ ກໍວ່າເປັນເລື່ອງ ເຫຼືອເຊື່ອ. ແມ່ນຫາດຊາຍ ໃນສາຍນໍ້າ ເຊກອງນີ້ລະ ທີ່ຊາວອັດຕະປື ພາກັນຮ່ອນເອົາຄຳ ໃນລະດູແລ້ງ, ອັນເປັນ ທີ່ມາຂອງຄຳວ່າ “ອັດຕະປືປຶ້ງ ຂາຍຄຳແລກໄກ່”.


ທ່າແຮງ, ການພັດທະນາ ແລະ ການລິການ ດ້ານການທ່ອງທ່ຽວ

attp tour> ທ່າແຮງດ້ານການທອ່ງທຽ່ວ: ອັດຕະປື ມີຊັບພະຍາກອນ ຊຶ່ງສາມາດຈັດສັນ, ພັດທະນາໃຫ້ເປັນ ແຫຼ່ງທອ່ງທຽ່ວ ໄດ້ມາກມາຍ ຫຼາຍປະເພດ: ທຳມະຊາດ ມີຄວາມໂດດເດັ່ນ ເປັນພິເສດ ຍ້ອນຄວາມ ອຸດົມສົມບູນ ຂອງປ່າໄມ້ ແລະ ສາຍນໍ້າ. ຖ້າຫາກມີ ການຈັດສັນ, ການຍ່າງຊົມປ່າ, ຊົມສັດປ່າ, ການລອ່ງເຮືອ, ຊົມທິວ ທັດທໍາມະຊາດ ແລະ ວິຖີຊີວິດ ຂອງປະຊາຊົນ ຕາມສາຍ ນໍ້າເຊກອງ ແລະ ເຊກະໝານ ຊຶ່ງອາດຈະ ເຊື່ອມຕໍ່ ໄປຍັງກໍາປູເຈຍ ຈະເປັນທາງ ເລືອກໝຶ່ງ ຂອງນັກທ່ອງທ່ຽວ ຜູ້ທີ່ສະຫງວນ ຮັກທຳມະຊາດ.

> ພັດທະນາການ ດ້ານການທອ່ງທຽ່ວ: ອັດຕະປື ຫາກໍ່ໄດ້ເອົາໃຈໃສ ຕໍ່ວຽກງານ ການທອ່ງທຽ່ວ ນັບແຕ່ປີ 2000 ເປັນຕົ້ນມາ ຄືກັບຫຼາຍແຂວງ ໃນປະເທດ ໂດຍໄດ້ຈັດຕັ້ງ ຫ້ອງການທອ່ງທຽ່ວ ຂຶ້ນເປັນໝວ່ຍງານ ຂອງລັດ ເພື່ອຮັບຜິດຊອບ ຄຸ້ມຄອງ, ກວດກາສຳຫຼວດ, ວາງແຜນພັດທະນາ ແລະ ສົ່ງເສີມການທອ່ງທຽ່ວ. ປັດຈຸປັນ ຫອ້ງການ ທອ່ງທຽ່ວແຂວງ ພວມຮວ່ມກັບ ອຳນາດການປົກຄອງ ທ້ອງຖິ່ນ, ທຳການສຳຫຼວດ ແລະ ວາງແຜນ ຈັດສັນ ພັດທະນາ ການທອ່ງທຽ່ວ ເປັນແຕ່ລະບາດກ້າວ ໂດຍມີ ການເຂົ້າຮວ່ມ ຂອງປະຊາຊົນ ບັນດາເຜົ່າ; ໄດ້ປະກາດ ເປັນແຫຼ່ງທ່ອງທ່ຽວແລ້ວ 15 ແຫ່ງ ຊຶ່ງສວ່ນຫຼາຍ ເປັນການທ່ອງທ່ຽວ ແບບອະນຸລັກ, ປະຊາຊົນ ມີສວ່ນຮວ່ມໃນທຸກໆເມືອງ.

hpc> ແຜນພັດທະນາໃນອະນາຄົດ: ອັດຕະປື ພວມກ້າວເດີນ ໄປບົນເສັ້ນທາງ ແຫ່ງການ ພັດທະນາທະນາ ຮອບດ້ານ, ໃນປີ 5 ປີຂ້າງໝ້າ ແຂວງອັດຕະປື ຍິ່ງຈະມີໂສມໝ້າໃໝ່ເພາະ ສາມປະເທດ ລາວ-ຫວຽດນາມ-ກຳປູເຈຍ ໄດ້ເລັ່ງປະຕິ ບັດແຜນສ້າງ “ເຂດສາມຫລ່ຽມ ພັດທະນາ” ຂຶ້ນໃນບໍລິເວນ ພຶ້ນທີ່ແຂວງ ທີ່ມີຊາຍແດນ ຂອງສາມປະເທດ ເພື່ອເລັ່ງ ພັດທະນາ ເສດຖະກິດ-ສັງຄົມ. ແຜນນີ້ ຈະໃຫ້ບູລິມະສິດ ແກ່ການຮວ່ມມື ດ້ານການກໍ່ສ້າງ ແລະ ຍົກລະດັບ ລະບົບ ຄົມມະນາຄົມ, ໂຄງການຕ່າງໆ ດ້ານການຄ້າ, ຄວາມຮວ່ມມື ດ້ານການທ່ອງທ່ຽວ ເພື່ອໃຫ້ເປົ້າໝາຍ “ສາມປະເທດ ເປັນເຂດ ທ່ອງທຽ່ວ ອັນດຽວກັນ” ປາກົດເປັນຈິງ ແລະ ການສ້າງ ລະບົບຕາໝ່າງ ໄຟຟ້າເຊື່ອມຕໍ່ ເຂດສາມຫລ່ຽມ ພັດທະນາ ທີ່ວ່ານີ້ກວມເອົາ 13 ແຂວງ ຄື: ອັດຕະປື, ເຊກອງ, ສາລະວັນ ແລະ ຈໍາປາສັກ ( ລາວ ), ກອນຕູນ, ຢາລາຍ, ດາກລັກ, ດາກນົງ, ບິງເຟືອກ ( ຫວຽດນາມ ), ຊຽງແຕງ, ຮັດຕະນະຄີລີ, ກະແຈະ ແລະ ມົນດົບຄີລີ ( ກຳປູເຈຍ ).

> ການບໍລິການ: ນັບແຕ່ປີ ຕົ້ນປີ 2006 ເປັນຕົ້ນມາ ແຂວງ ອັດຕະປື ໄດ້ນຳໃຊ້ເສັ້ນທາງ 18 B ປູຢາງ ອັດສະຟານ ແລະ ມີດ່ານສາກົນ ສາມາດເອົາວິຊາ ກັບດ່ານ ໄດ້ທີ່ຊາຍແດນ ພູເກືອ ( ລາວ ) ແລະ ເບີອີ ( ຫວຽດນາມ ), ປະກາດໃຊ້ ເປັນດ່ານສາກົນ, ອັນເປັນ ເງື່ອນໄຂ ສະດວກ ເພື່ອເຮັດ ການບໍລິການ ທ່ອງທ່ຽວ ເຊື່ອມເຂົ້າກັບ ເຂດສາມຫລ່ຽມ ພັດທະນາ ລາວ-ຫວຽດນາມ-ກຳປູເຈຍ ແລະ ເສັ້ນທາງ ຂອງອະນຸ ພາກພື້ນ.

> ດ້ານໂຮງແຮມ, ເຮືອນພັກ, ຮ້ານອາຫານ, ການຂົນສົ່ງ ແລະ ການຜະລິດ ສິນຄ້າ, ເຄື່ອງທີ່ລະນຶກ ຈຳນວນໝຶ່ງ ຂອງປະຊາຊົນ ທ້ອງຖິ່ນ ກໍເລີ່ມ ເກີດຂື້ນ ເພື່ອຮອງຮັບ ການຂະຫຍາຍຕົວ ຂອງການ ທ່ອງທ່ຽວ. ມີໂຮງແຮມ ເຮືອນພັກ ຣິສອດ 16 ແຫ່ງ, ຮ້ານອາຫານ, ບັນເທິງ 52 ແຫ່ງ, ບໍລິສັດ ທອ່ງທຽ່ວ, ບໍລິການ ຂົນສົ່ງ ທັງພາຍໃນ ແລະ ຕ່າງປະເທດ ຫວຽດນາມ-ໄທ ກໍສະດວກ ສະບາຍ ມີລົດປະຈຳທາງ ແລະ ບໍລິການ ສະເພາະ ລະດູການ ທີ່ເໝາະສົມ ກັບການທ່ອງທ່ຽວ ຢູ່ອັດຕະປື ແມ່ນແຕ່ ເດືອນ ຕຸລາ ຫາ ພຶດສະພາ, ໃນລະຫວ່າງ ເດືອນຕຸລາ ຫາ ກຸ່ມພາ ອາກາດ ອົບອຸ່ນ, ມີນາ-ພຶດສະພາ ແມ່ນຮ້ອນຫຼາຍ, ສຳລັບ ເຂດພູດອຍ ອາກາດເຢັນ ຕະຫຼອດປີ.


IMG 20171009 WA0039

ແຫລ່ງທ່ອງທ່ຽວທຳມະຊາດ, ປະຫວັດສາດ ແລະ ວັດທະນະທຳ

seplsepha> ຕາດເເຊພະ ແລະ ແຊປ້ອງໄລ: ເປັນຕາດ ທີ່ສວຍງາມ, ເກີດຈາກ ສາຍນໍ້າເຊປຽ່ນ, ແຊພະກວ້າງ 120 ແມັດສູງ 23 ແມັດ, ແຊປ້ອງໄລ ຫ່າງຈາກ ຕາດແຊພະ 8 ກມ, ນໍ້າຕົກຕາດ ແບ່ງເປັນສອງສາຍ ຝັ່ງຊ້າຍສູງ 20 ແມັດ, ຝັ່ງຂວາ 30-40 ແມັດ.

> ຕາດສະໝອງພາກ: ເກີດຈາກ ນໍ້າຫ້ວຍ ສະໝອງ ໄຫຼລົງໃສ່ ເຊປຽ່ນ, ສູງປະມານ 10 ມ, ກວ້າງ 30 ມ, ຍາມແລ້ງ ສາມາດ ໄປເຖິງ ໄດ້ດວ້ຍລົດ 75 ກມ ຈາກເທ ສະບານແຂວງ, ຍາມຝົນ ຂີ່ລົດ 35 ກມ ແລ້ວຂີ່ເຮືອ ທວນນໍ້າ ເຊປຽ່ນ ຂຶ້ນໄປ ໃຊ້ເວລາ ປະມານ ໝຶ່ງຊົ່ວໂມງເຄິ່ງ, ຈາກນີ້ ໃຊ້ເວລາຍ່າງ ປະມານ ເຄິ່ງຊົ່ວໂມງ ກໍໄປເຖິງ ຕາດແຊພະ ຫຼື ຍ່າງ 2 ຊົ່ວໂມງ ກໍໄປເຖິງ ຕາດແຊ ປ້ອງໄລ ເໝາະສຳລັບ ຜູ້ຊື່ນຊົມ ການທ່ອງທ່ຽວ ທຳມະຊາດ.

> ຕາດພອກ: ເກີດຈາກສາຍນໍ້າ ຫວ້ຍໄຫລ ຕົກຈາກ ຫຼັງພູຫຼວງ ອ້ອມຮອບບໍລິເວນ ນັ້ນເຕັມ ໄປດ້ວຍ ດອກໄມ້ປ່ານາໆ ຊະນິດ, ຫ່າງຈາກ ເທສະບານ ເມືອງສາມັກຄີໄຊ 15 ກມ .

> ໝອງລົມ: ເປັນໝອງນໍ້າ ໃຫ່ຍທີ່ສຸດ ໃນແຂວງອັດຕະປື, ມີປະຫວັດຍາວ ນານໝ້າສົນໃຈ, ອຸດົມດວ້ຍປູປາ ແລະ ກຸ້ງ, ອາກາດສົດຊື່ນ ເໝາະສຳລັບ ການໄປພັກຜອ່ນ ກິນເຂົ້າປ່າ, ຢູ່ຫ່າງຈາກ ເທສະບານເມືອງ ສາມັກຄີໄຊ 12 ກມ. ໄປເຖິງໄດ້ງ່າຍ ດ້ວຍເສັ້ນທາງ 18A ສາມັກຄີໄຊ ຫາ ສະໝາມໄຊ.

> ຕາດຫົວຄົນ: ເກີດຈາກ ເຊນໍ້ານອ້ຍ, ກວ້າງ 200 ແມັດ ສູງ 10-15 ແມັດ ຢູ່ບ້ານຫົວໝື່ນ ຫ່າງຈາກ ເທສະບານ ແຂວງເຊກອງ 16 ກມ ແລະ ແຂວງອັດຕະປື 60 ກມ, ໄປເຖິງດວ້ຍເສັ້ນທາງເລກ 11 ເຊກອງ ຫາ ອັດຕະປື ແວ່ເບື້ອງ ຊ້າຍມືພຽງ 600 ແມັດ, ມີເຮືອນພັກ ແລະ ຮ້ານອາຫານ ພ້ອມໃຫ້ບໍລິການ.

vsthvathsayseththa> ຫໍມູນເຊື້ອ ແລະ ວັດພະເຈົ້າ ໄຊຍະເສດຖາ: ວັດເກົ່າແກ່ຂອງ ເມືອງໄຊ ເສດຖາເດີມ ຊື່ວັດທາດ ຈຸລະມະນີ, ມີທາດບັນຈຸ ອັດຖິຂອງ ພະເຈົ້າ ໄຊຍະເຊດຖາ ສ້າງໃນປີ 1577 ແລະ ຮ່ອງຮອຍ ປະຫວັດສາດ ກ່ຽວກັບ ເຈົ້າໄຊຍະເສດຖາ, ສາມາດ ໄປເຖິງໄດ້ ສະດວກ ດ້ວຍທາງ 18B ພຽງ 15 ກມ.

 

tn DSC06041> ວັດພະອົງແສນ: ສຸຂະຣາມ ເປັນທີ່ ປະດິດສະຖານ ພະພຸດທະຮູບ ສັກສິດ ຄູ່ບ້ານຄູ່ເມືອງ ຊຶ່ງຄົນທັງຫຼາຍ ເຄົາລົບນັບຖື ແລະ ເລື່ອງລືວ່າ ສາມາດດົນບັນດານ ໃຫ້ຜູ້ສັກກາຮະບູຊາ ສົມມັກ ສົມປາດຖະໝາ ຕາມທີ່ຕັ້ງໃຈ ອະທິດຖານ; ວັດນີ້ ຢູ່ບ້ານຊະແຄະ ເມືອງໄຊ ເສດຖາ ສາມາດໄປເຖິງ ໄດ້ສອງທາງ ຄື: ໃຊ້ເສັ້ນທາງ 11 ອັດຕະປື-ເຊກອງ ແວ່ຂວາມື ທີ່ກິໂລແມັດທີ 22 ເຂົ້າໄປ 3.5 ກມ ແລ້ວຂ້າມນໍ້າ ເຊກອງ ດວ້ຍເຮືອ. ໃຊ້ເສັ້ນທາງ 18B ຈາກຂົວເຊກອງ ເຖິງກິໂລແມັດທີ 11 ແລ້ວແວ່ ຊ້າຍມື ໄປຕາມທາງ ດິນແດງ 17 ກມ.

 

> ຕາດພະຟອງ: ນໍ້າເຊຊຸ ໄຫລຫລອດພູ, ງົດງາມດວ້ຍຫີນ ສີຕ່າງໆ ປະດັບຢູ່ສອງຝັ່ງ, ຢູ່ຫ່າງຈາກ ເມືອງສາມັກຄີໄຊ 32 ກມ ໄປຕາມ ທາງເລກ 18B ອອກໄປ ຫວຽດນາມ ແລ້ວແວ່ຂວາມື ໄປຕາມທາງຍ່າງ ຜ່ານປ່າໂຄກຕີນດົງ ທີ່ສວຍງາມ ປະມານ 6 ກມ ຫຼື ຂີ່ເຮືອຈັກ ຂຶ້ນຕາມລຳເຊຊຸ ຈາກ ເມືອງໄຊເສດຖາ ປະມານ 5 ຊົ່ວໂມງ. ລູກສອນໄຟ ໂຊວຽດ ແບບ 11 DMP 912 ແລະ ເສັ້ນທາງ ໂຮ່ຮ່ຈິມິນ ອະນຸສອນ ສົງຄາມ ທີ່ ເມືອງຊານໄຊ, ຢູ່ໃກ້ ຕາດນໍ້າປາ.

> ຕາດນໍ້າປາ ( ດາກປາ ) ຫລື ຕາດຈໍ: ຢູ່ໃກ້ກັບ ລູກສອນໄຟ ທີ່ເມືອງຊານໄຊ ຫ່າງຈາກ ເມືອງສາມັກຄີໄຊ 31 ກມ ໄປໄດ້ສະດວກ ດວ້ຍທາງປູຢາງ.

missalemissale view> ລູກສອນໄຟ: ມີຈຸດທີ່ຕັ້ງ ຢູ່ເມືອງຊານໄຊ, ຢູ່ເບື້ອງຂວາມື ບ່ອນທາງ ສາມແຍກ ໄປຕາດນໍ້າປາ ຫລື ຕາດຈໍ, ໄປເຂື່ອນໄຟຟ້າ ເຊກະໝານ 1, ຫ່າງຈາກເມືອງ ສາມັກຄີໄຊ ດ້ວຍເສັ້ນທາງປູຢາງ ຜ່ານເມືອງ ໄຊເສດຖາ ດ້ວຍໄລຍະທາງ 31 ກມ.

 

> ດົງໄມ້ກາຍເປັນຫີນ: ເທິງເນື້ອທີ່ 36 ເຮັກຕາ ມີຫີນທີ່ມີ ລັກສະນະ ຮູບຮ່າງຄືທອ່ນໄມ້ ມີລິງລາຍ ( ໄມ້ກາຍເປັນຫີນ ) ຍັງຢາຍຢູ່ເທິງ ໝ້າດິນ ທີ່ບໍລິເວນ ກິໂລແມັດ 24 ໃນເຂດບ້ານ ຫາດຊັນ ເມືອງໄຊເສດຖາ ສາມາດໄປເຖິງ ໄດ້ງ່າຍ ດວ້ຍທາງ 18B.

> ນໍ້າຕົກຕາດ ຮະມອງ: ນໍ້າຕົກຕໍ່ເນື່ອງ 7 ຊັ້ນ ສູງປະມານ 85 ແມັດ ງົດງາມຫຼາຍ ເກີດຈາກສາຂາ ຂອງນໍ້າເຊຊຸ ຕົກໃສ່ ນໍ້າເຊກະໝານ ຕັ້ງຢູ່ເຂດບ້ານຫ້ວຍ ເຂດເມືອງພູວົງ ສາມາດໄປເຖິງ ໂດຍໃຊ້ລົດ ໂອໂຕ, ລົດຈັກ, ລົດຖີບ ດ້ວຍເສັ້ນທາງເລກ 18B ເຖິງ ກິໂລແມັດ 52 ບ້ານ ເຜົ່າມີໄຊ ມີປ້າຍບອກ ແວ່ຂວາມື ໄປຕາມທາງດິນແດງ ເຖິງເຊຊຸ ຂີ່ເຮືອຂ້າມຝາກ ເດີນທາງຕໍ່ ເຖິງນໍ້າຕົກ 23 ກມ. ຫາກສືບຕໍ່ໄປ ຕາມທາງ ນີ້ຈະສອດໃສ່ທາງ 18B ທີ່ກິໂລແມັດທີ 100.

22050072> ໝອງຟ້າ: ເປັນຕົ້ນກໍາເນີດ ຂອງເຊກະໝານ, ຕັ້ງຢູ່ເຂດປ່າ ສະຫງວນ ດົງອຳພາມ ບໍລິເວນ ທີ່ມີຫົວພູຈຸ້ມ ເຂົ້າໃສ່ກັນ ຢູ່ລະດັບສູງ 1.200-1.500 ແມັດ ໃນເມືອງຊານໄຊ ເບື້ອງທິດ ຕາເວັນອອກ ຂອງແຂວງ, ຄົງເປັນໝອງ ທີ່ເກີດ ຈາກພູໄຟ ລະເບີດ ເມື່ອຫຼາຍພັນໆ ປີຜ່ານມາ. ໝອງກວ້າງ ປະມານ 1 ກມ, ເລິກບໍຮູ້ທໍ່ໃດ ນໍ້າສີຂຽວໃສ ຄືນໍ້າທະເລ. ຊາວອັດຕະປື ຖືວ່າເປັນໝອງ ທີ່ມີຄວາມເລິກລັບ ແລະ ມີເລື່ອງລາວ ກ່າວຂານ ໝ້າສົນໃຈ ວ່າ: ມີໄກ່ຜູ້ໂອກ ປີກຄຳ ເຝົ້າ ແລະ ເປັນເຈົ້າບັນຊາ ໃຫ້ນໍ້າຂຶ້ນລົງ. ສາມາດ ໄປເຖິງ ໄດ້ສະດວກ ໃນຍາມແລ້ງ 178 ກມ, ດວ້ຍລົດ ຕາມເສັ້ນທາງ 18B ອັດຕະປື-ພູເກືອ ມີປ້າຍບອກທາງ ແວ່ເບື້ອງຊ້າຍ ທີ່ກິໂລແມັດທີ 102 ໄປຕາມທາງດິນແດງ.

tn Photo 0026> ໝອງທົ່ງໄກໂອກ: ຢູ່ຫ່າງຈາກ ໝອງຟ້າ ໄປອີກ ປະມານ 15 ກມ, ເປັນໝອງ ທີ່ເລິກລັບ ບໍ່ມີຂໍ້ມູນ ລະອຽດ ສວ່ນທົ່ງ ໄກໂອກ ແມ່ນງົດງາມ ດວ້ຍທົ່ງຫຍ້າ ຮາບພຽງ ກວ້າງໄກ ສຸດສາຍຕາ.

 

 

 

 

 

 


> ໂຮງແຮມ, ເຮືອນພັກ ແລະ ເຄື່ອງຫັດຖະກຳທີ່ລະນຶກ:
tn DSC05686- ໂຮງແຮມ ຮ່ວງແອັງອັດຕະປື
- ໂຮງແຮມ ດອກຈຳປາ ບ້ານ ເຊກອງ
- ໂຮງແຮມ ພຸດທະວົງ ບ້ານ ເຊກອງ
- ໂຮງແຮມ ສຸກສີມອນ ບ້ານ ໄຊສະອາດ
- ໂຮງແຮມ ເພັດດາລາ ບ້ານ ຫຼັກສາມ
- ໂຮງແຮມ ອາລຸນສົດໃສ ບ້ານ ວັດຫຼວງ
- ໂຮງແຮມ ເຟືອງມີໄຊ ບ້ານ ເຊໃຫ່ຍ
- ຣິສອດເພັດສຸກໄຊ ບ້ານ ເວີນແຄນ
- ເຮືອນພັກ ສຸກສົມພອນ ບ້ານ ວັດຫຼວງ
- ເຮືອນພັກ ວັນນະສິດ ບ້ານ ໂພນສະຫວ່າງ
- ເຮືອນພັກ ແສງຈັນ ບ້ານ ຫຼັກສາມ
- ເຮືອນພັກ ນາຊາຍທອງ ບ້ານ ນາຊາຍທອງ
- ເຮືອນພັກ ຄຳພູ ບ້ານ ເມືອງໃໝ່
- ເຮືອນພັກ ດອກຈຳປາ ບ້ານ ວັດຫຼວງ
- ເຮືອນພັກ ມີ່ຫັນ ບ້ານ ເມືອງໃໝ່
- ເຮືອນພັກ ມີ່ຫັນ ບ້ານ ເຊໃຫ່ຍ

> ຮ້ານອາຫານ: ມີຮ້ານອາຫານ ຈຳນວນໝຶ່ງ ໃນເມືອງສາມັກຄີໄຊ ຊຶ່ງຫາໄດ້ງ່າຍ, ແຕ່ລະຮ້ານ ມີຊື່ບອກຄວາມເປັນທ້ອງຖິ່ນ.
FB IMG 1507097101766- ດອກຈໍາປາ ບ້ານ ເຊກອງ
- ເພັດສຸກໄຊ ບ້ານ ເວີນແຄນ
- ສະບາຍດີ ອັດຕະປື ບ້ານ ເຊໃຫຍ່
- ນາກຽ້ງ ບ້ານ ຫຼັກສາມ
- ເລກ 1 ບ້ານ ເຊໃຫ່ຍ
- ຕາດຫົວຄົນ ບ້ານ ໝື່ນຫົວເມືອງ
- ໄຊສິດທິເດດ ບ້ານ ຕານຊຸມ
- ແສງສຸກ ບ້ານ ຫຼັກສາມ
- ກົງໃຈ ບ້ານ ເຊໃຫຍ່ ມີອາຫານທ້ອງຖິ່ນ ຄື: ໝຶ່ງໝົກໃບຮຸ່ງ, ນໍ້າເສ້ຍ, ອີ່ຍົກ, ຕະໂໝດຊິ້ນ, ເຫຼົ້າຕະໝຽນ ແລະ ເຫຼົ້າໄຫມືຖື ພວມເລົ່າລືກັນໃຊ້ ຢະເອີຍ !.

> ແຫຼ່ງຫັດຖະກໍາ ແລະ ເຄື່ອງທີ່ລະນຶກ: ແຫຼ່ງຫັດຖະກຳທີ່ຢູ່ໃກ້ ໃນເມືອງສາມັກຄີໄຊ ແມ່ນການປັ້ນໝໍ້ ຫຼໍ່ໄຫ ແບບພື້ນເມືອງ ຂອງຊາວບ້ານທ່າຫີນ ເມືອງສາມັກຄີໄຊ ຫາກ ຈະຫາອັນໃດ ອັນໝຶ່ງເປັນຂອງ ທີ່ລະນຶກຈາກ ອັດຕະປື ຄົງບໍ່ມີອັນ ໃດດີກວ່າຜ້າຝ້າຍ ຂອງເຜົ່າຕຮຽງ ບ້ານສາຍສຳພັນ ເມືອງສາມັກຄີໄຊ ຫຼື ເຄຶ່ອງຫັດຖະກຳ ຈັກສານ ຊຶ່ງມີຄວາມໝາຍ ປານີດ ງົດງາມ ເປັນພິເສດ, ຫາຊົມ ແລະ ຊື້ໄດ້ ທີ່ຕະຫຼາດ ໃນເມືອງສາມັກຄີໄຊ.